Pyniasoh sa ka UDP, sha ka sorkar synrop NPP

U Conrad Sangma, u heh duh jong ka seng NPP, un bam smai kum u myntri rangbah, ha ka 7tarik Lber 2023 bad khlem pep, kane ka sorkar synrop lane ka MDA – 2, kan lah ban long ka sorkar kaba skhem, lyngba ka jingleit rung ka seng UDP, kaba wan ba ar, ha ka jingjop bun briew, ha ka elekshon dorbar jylla, ba dang shu dep.

Haba iakren ia kane ka mat, ka la dei ruh, ba ngin sngewthuh, ba kine ki sngi, ki dei pleng, ki sngi jong ki sorkar synrop, ha kaba kano kano ka seng, kam lah satia ban synshar tang marwei bad ia katei ka paw shai, ha kane ka sien ruh, ba kat ka jingkob sob jong ka NPP, ba kan thaw sorkar marwei, da ka jingdon ia u number donbok uba 34, hynrei, ka dang hap leit wad ia ki tit, ba kynthup ia ki arngut ki dkhot khlem seng, ia ki arngut ki MLA HSPDP bad mynta sa ia ka UDP bad ka PDF.

Katba ka jia; ka elekshon, ka la kut bad u paidlang ka jylla, ula dep ai ia la ka jong ka rai, ha kaba ki Garo, ki la pynjop donburom ia ka seng NPP, ha kane ka kynti bad kim shym la ailad satia, wat ia U Mukul Sangma, lane ia ka seng Congress; katba u paidlang na Khasi, Jaintia (khamtam na Khasi lei lei), ki la kyntait ia ka seng NPP bad kumjuh kim shym la pdiang, wat ia ka seng UDP.

La iohi ruh, ia ka jingkwah, ban thaw ia ka sorkar seng trai ri, hynrei lada ia khein, ia ka jingdon briew jong ka UDP (11), VPP (4), PDF (2), HSPDP (2), ka dang long dang 19ngut bad kumta, ka rai jong u paidlang ka jylla, ka pyni, ba kam pat iahap satia, na ka jingkhein ban kam sha ka liang synshar bad ki seng trai ri, ki dei ban don sha ka liang pyrshah.

Ka jinglalot jong ki nongthep vote, ha kine ki sngi, la iohi, kumba ka la pynjah jingkhein ia kiba bun ki kyrtong elekshon bad dei na katei ka daw, ba kiba jop, ki ia kynthih ialade, ban don sha ka liang synshar, ba kin ioh ban ai dud ai malai ia ki nongjied bad ban lum spah lum hajar ialade, ban pyndap ia ki paidbah kiba thngan baroh san snem.
Kam dei tang katta, la iohi, ba katto ki jingshah bein shah khoh jong ka NPP, hynrei, ha ka jaka, ba kan nang hiar, ka nangkiew pynban bad kat ka jingshah bein jong ka UDP ruh, hynrei, na ka jingjop kaba 6ngut ha u 2018, ka tam mynta, la jan mar shiteng.