Aiti u Conrad ïa ka shithi iehnoh kam, ha u Lat

Shillong:U Lat ka Jylla Phagu Chauhan ha ka sngi Thohdieng, ula khot ïa ka National People’s Party (NPP), kaba don bun paid eh ha ka Ïing Dorbar da 26 seat, ba kan thaw ïa ka Sorkar thymmai ha Jylla.

“U Lat ka Jylla ula khot ïa ngi ban thaw sorkar,” ong u Nongïalam ka Parlia mentary Party ba dang shu shah jied ka NPP u Conrad K Sang ma haba ïakren bad ki nongthoh khubor hadien ba ïakynduh ïa u Lat ka Jylla.

U Conrad ula aiti ruh ïa ka shithi iehnohkam kum u Myntri Rangbah ka Jylla ha u Lat.
Ïa u Conrad la synran da ki MLA ka NPP, ki 2 ngut ki MLA ka BJP Bah Sanbor Shullai bad Bah AL Hek bad u MLA ka Baghmara Kartush R Marak.

Kumba long mynta ka NPP ka don 29 ngut ki MLA, 26 ngut ki MLA jong lajong bad ka la ïoh ïa ka jingkyrshan na ki 2 ngut ki MLA ka BJP bad u MLA shimet.
U Conrad u pyntip ba ka NPP kan sa aiti noh ïa ka thup kyrteng jong ki MLA mynta ka janmied. Katkum ka jingong jong u, kiba bun ki MLA ka NPP ki dang don ha lynti sha Shillong namar ïa ka result dang shu dep pynbna ha ka sngi Palei.
Shwa ban leit sha Ïing u Lat, ka NPP ka la shong ïa ka jingïalang Parliamentary Party ha ryngkat ki MLA ka BJP bad u MLA shimet.
U National Vice President ka NPP u Bah Prestone Tynsong bad MLA ka Pynursla ula pynbna ïa ka rai jong ka Party ba la jied biang ïa u Conrad K Sangma kum u PP leader.