Liem lyndang, ki MLA kyntiap seng

Ki MLA kyntiap seng, ki la liem lyndang lut, ha kane ka elekshon 2023 bad katei, ka la dei ban long ka jingsneng ia kiwei ruh, ha ki snem, ki ban sa wan.

Lait noh ka kong Ampareen, kaba la jop bun sien na East Shillong bad kaba la kyntiap seng ruh arsien bad nangta sa U Bah Renikton Lyngdoh, U Bah Mayraldborn Syiem; hynrei, la iohi ia U bah George B Lyngdoh, uba la mih na ka seng Congress bad uba dei u nongialam ka TMC, ba ula shah rem noh; nangta U Bah HM Shangpliang, uba la mih na ka Congress bad leit iasoh sha ka BJP, U Ma Shitlang Pale, uba leit iasoh sha ka UDP, U Bah Jason Sawkmie, uba leit NPP, U Bah Hamlet Dohling, uba leit NPP, U Bah PT Sawkmie, uba leit UDP na ka seng Congress, U Bah Mohendra Rapsang, uba iasoh NPP, U Bah Kimfa Marbaniang, uba iasoh NPP bad sa kiba bun kiwei pat na Garo Hills.

Ym tang katta, la iohi, ba wat U Mukul Sangma, uba dei u snar ka politiks, hynrei, u shah pynliem na Tikrikila bad nangta u para jongu, U Zenith Sangma bad ka tnga jongu, ka Dikanchi Shira, ki shah pynliem ha kane ka sien.
Kaba isynei, ia ki MLA, kiba dang shu jop nyngkong, ba ki leit bieit ha ki jing pynngop bad ki shu jot ei khamakha bad kitei ki kynthup ia arngut na ka seng PDF bad sa bun ngut na ka seng Congress bad ha kaba khadduh, hap ai burom ia ki nongialam jong ka seng na Sohra bad Mawkynrew, ba ki ieng, ha la ka jong ka nongrim bad ki la jop biang sa shisien, ha kane ka kynti.

Kam dei tang katta, ka pyn kyndit ruh, ba ha kane ka kynti, ka Nongkrem, ka la kyntait ruh, ia u riew kyntiap Constituency, U Ma Dasakhiat Lamare, uba la tip ruh, ba u dei u heh spah, uba don ia ka kali kaba haduh T.4klur.
Haba peit na ka result, la iohi ruh ba ki Constituency ha sor bad khap sor, kim biej pisa satia, namar ba ka seng NPP, ka la theh jubor, da ki skhim sorkar, sha ki kyrtong jongka ha West Shillong, ha North Shillong, ha Mylliem, Nongkrem, Mawlai, ha Pynthorum khrah bad kiwei; hynrei ka pisa sam ei kaba T.5hajar shi khlieh, kam trei kam satia ha kitei ki Constituency bad ki kyrtong jong katei ka seng, ki liem lyndang, ha ki kyrtong kiba don ia ka jingieid jong u paidbah, kum ia U bah Adelbert Nongrum, Bah Paul Lyngdoh, bah Ardent Basaiawmoit, Bah Brighstarwell Marbaniang.