Ki nongkyndong, ki ia pein da ka pisa ia ka vote?

Ka jingpoi ki nongthep vote, ha ki Constituency ha sor, ka long kaba duna haduh katta katta, ha kaba ka long tang hapdeng ka 60 percent tam eiei bad katei ka pyni shai ba ki nong sor, ki la ngiah ban thep vote.
Halor katei ka mat, ka wan ka jingiakren, ia ka bor jong ka pisa, namar ba ki don bun ki Consti tuency kiba ha sor bad khap sor ruh, kiba theh pisa bha; hynrei hangne ruh, la iohi, ba ka bor jong ka pisa kam trei kam, namar ba ki 35, 36 ngut na ka 100 percent, kin dei beit, kiba la shah tyrwa pisa lane kiba ioh pisa; tangba kim treh hi ban leit thep ia la ki jong ki vote.

Ha ki Constituency nong kyndong pat la iohi, ba ki nongleit thep vote, ki bun bha, ha kaba ha Jaintia hills (kaba la tip, ba ka dei ka ktem bah jong ka jing iather pisa), ki poi sha ka 80 haduh 90 percent, ha kaba ka Mowkaiaw lei, ka por sha ka 92.73 percent bad katei ka jingkhein antad, kaba 80 percent tam, ka long ha kylleng ki Constituency ha Khasi, Jaintia bad ha Garo hills.

Kumta ka wan ka jingkylli, ba lada ki nong sor, ki la jlep thep vote, wat haba ki la biang lut ia ki skul, ki hospital, ki surok, ka um bah umdih; ki kali ban ia leit ia wan, ka ding ilektrik bad nangta sa ka pisa kaba ioh buk buk; hynrei kumno pat, ba kim leit ban thep vote; katba ki nong kyndong, ki bym biang ki surok, ka umbam umdih, ki hospital bad kiwei, ki leit thep vote hapdeng ka 80 haduh 90 percent tam bad kane ka pyni, ba kim shym leit satia, da ka mon lajong, hynrei, ki la shu shah pynbor lane ba ki shah thied ia ka vote jongki lane lehse, ngi lah ban buh, ha kawei ka kyntien, ba hato ki nongkyndong, ki kham sngew thuh bha ma ki pleng, ia ka dor jong ka jingjied nongmihkhmat lane ka synshar paidbah?

Wat la ka elekshon bad ka jingniew vote, ka la dep, hynrei kitei ki jingshisha haneng, ki long kiba donkam eh, ia ka elekshon komishon bad wat ia ki seng sain pyrthei bapher, ba kin tih bniah ia ki jingshisha bad hangta, kin sa tip, ia ka daw jong ka jingbun ki nongthep vote sha ki nongkyndong bad ka jingduna jongki pat sha ki Constituency kiba ha sor bad ba kin sngewthuh, ban pynkhreh ia la ki jong ki mat trei kam jongki, ban pynkhie im ia ka synshar paidbah, khamtam ha ki jaka sor.