Ki nong sor, ki la ngiah thep vote

Ka elekshon jied nong mihkhmat, ha ka 27tarik Rymphang 2023, ka dei ka dak, kaba ki nongmihkhmat lane ki seng sain pyrthei, kin hap ban pyrkhat bha, ia ki mat treikam jongki bad kata ka long ba ki briew kiba la khein, ba ki dei kiba nang ba stad ne kiba tip ain tip kanun, ki la ngiah thep vote ha kine ki sngi.

Na ka jingkhein, la iohi, ba ha Pynthorumkhrah, kaba dei ka pdeng bah jong ka nongbah Shillong, kiba leit thep vote, ki don tang 73.31 percent, ha Mawlai 79 percent, ha East Shillong 64.69 percent, ha North Shillong tang 64.76 percent, ha West Shillong 67.38 percent, ha South Shillong tang 62.10 percent bad ka dei ruh ka jingleit thep vote, kaba rit duh, ha ka jylla hi baroh kawei.

Ha Nongthymmai ruh, kaba dei ka pdeng bah jong ka Shillong, ka jingleit thep vote, ka long 66.58 percent. Kam dei tang katta, hynrei ha North Tura, kiba poi thep vote, ki long 75.98 percent bad ha South Tura, ki long 73.65 pc.
Kitei ki dak ki shin, ki pyni shai namarkata ba ki nong sor pleng, ki la ngiah ban thep vote, lane kaba long ba 35ngut na man ka 100ngut ki nongthep vote, kim kwah shuh ban leit thep vote bad katei ka dei ka dak, kaba ki MLA lane ki seng sain pyrthei, ki dei ban sngew khuslai ialade, namar ba ka pisa ruh, kam ktik, na ki jaka ba ki nongthep vote ki smiej.

Ki jingtrei kam ha sor, ki la syrtap da kijuh shi kijuh, ha kaba ia ka surok, la hap ban ai rong ia kajuh shi kajuh, ia ka iing dorbar, la hap ban satah ia kajuh shi kajuh bad ki lynti iaid kjat, ki madan ialehkai bad kumta ter ter bad kitei kim dei satia ki kam pynroi, hynrei, ki dei ki kam pynlut phut lane pynjah rngai ia ka MLA Scheme bad ki samla ha sor, kim kwah lynti iaid kjat, kim kwah iing dorbar, hynrei ki kwah kam, ki kwah iing shong kaba biang, ki kwah jaka ban thaw iing ialade bad ki kwah ka jaka bret niut kaba biang, ki kwah ka ding ilektrik, kaba thikna, ka umbam um dih, ki jaka pule kiba biang, ki kali kiba biang ia ka leit ka wan bad ter ter.

Ka la dei ka por, ia ki nong ialam sorkar lane ki nong mihkhmat, ba kin kylla thiah kylla dem ialade, namar ba lada ki 35ngut, na ka 100ngut, ki pep thep vote, kumta kam dei shuh ka jingkhein kaba rit bad kaba ima, ka long ba ha ki elekshon, ki ban wan, kin poi sa tang mar shiteng, kiba kwah ban jied nongmihkhmat.