Kam u convener ka NEDA ba ka Sorkar NDA kan synshar ha lai tylli ki jylla ka thaiñ shatei lam mihngi

Shillong: U Convener jong ka North East Democratic Alliance (NEDA), u ba long ruh ha kajuh ka por kum u Myntri Rangbah jong ka jylla Assam, u Himanta Biswa Sharma, u la kam ba ka kynhun jong ka sorkar NDA kan ialam ia ka sorkar ha ki lai tylli ki jylla kata ha Nagaland, Meghalaya bad Tripura hadien ba ki stad pyrman elekshon ki la dep pynbna ba ki paralok jong ka BJP, kin synshar biang ha kitei ki lai tylli ki jylla.

Haba iakren bad ki nongpathai khubor ha nongbah Guwahati, u Himanta Biswa Sharma, u la iathuh ba ki paralok kiba don ha ka NEDA bad NDA kin ym leit iatreilang satia bad kiwei ki parti kum ka Congress bad ka Trinamool Congress. U Sharma u la iathuh ba ka ka NDA kan thaw sorkar ha baroh lai tylli ki jylla.

Haba iadei bad ki myntri rangbah ha jylla Tripura u Himanta u la iathuh ba u Myntri Rangbah ha jylla Tripura un dei beit na ka parti BJP, katba ha jylla Nagaland pat ,kaba ka BJP bad kiwei ki parti ki iatreilang u la iathuh ba kan dei ka sorkar synroplang.

Haba phai sha ka jylla Meghalaya, u Himanta Biswa Sharma u la iathuh ba ia u myntri rangbah ha jylla Meghalaya, yn sa shim rai hadien ba ka parti BJP ka tip tikna ba haduh katno ngut ki MLA kin ioh ha kane ka kynti ba mynta.

Ka jingñiew vote ha kine ki lai tylli ki jylla kan long ha ka 2 tarik u Lber, hadien ka jingthep vote ba la pynlong ha ka 27 tarik rymphang 2023.