Kumba 74.32% poi ki nongthep vote ha jylla, duna tam ha South Tura

Shillong:Ka Election Commission of India (ECI) ka pyntip ba ka jingpoi thep vote jong ki paid nongshong shnong ka Jylla Meghalaya ban jied ïa ki 59 ngut ki MLA ba thymmai sha ka Ïingdorbar Thaw Aiñ ka Jylla, ka la kot 74.32%.

Kane ka jingpoi thep vote ka la duna haduh 11% duna na ka jingpoi thep vote jong ki paidbah ha ka ilekshon MLA-2018 ha Jylla.

Katkum ka jingkheiñ ba la ai da ka ECI, ka Mawthadraishan Constituency ka dei kaba mih bun tam ki nongthep vote kaba la kot haduh 90.4 %, bud sa ka Mairang kaba don markhap kaba kot haduh 90.1%.
Hynrei kaba duna tam na ka jingpoi thep vote jong ki paidbah ka dei ka South Tura Constituency kaba mihkhmat da u Myntri Rangbah ka Jylla Conrad K Sangma, kaba la poi tang 52.1%, bud sa ka North Tura kaba kot 55.5%.