HA KA KUTLAD

P.B.S

[ba bteng] Hadien ba la dep dihsha bad ka samla hadien katto katne por ka por ruh sa ban dap noh hi 5:30 janmiet. Shuwa ba ka Aitilin kan leit noh ka kmie bad u kpa u Hiram ki la shu sneng kyllum hadien ba ki la poi kha poi man hadien ba kin shongsuk shongsain ka jingsneng ka la ia syriem kumba pyniathoh ha iingmane Khristan. Ka Aitilin ka ieng ban ai khublei ia ka kmie bad u kpa u Hiram bad ka mih noh na iing bad la leit on da u Hiram.

“Kumno phi sngew biang kane ka jingwan ialam pynithuh iing jong nga?” twad jingmut u Hiram
“Balei kam biang haba phi ruh phin sa wan sah noh hi ha iing jong ngi” pynphai ktien ka Aitilin bad ka ai kwai ha u Hiram
“Ka jingsneng jingpyni te ka la biang jhor bad la sngew hun hi jrut, ne phi dang don jingong sa kumwei pat?” kylli u Hiram
“Lah biang kein tangba ka shong sa ha phi bad ha nga pat khamtam eh ia phi u rangbah” ong ka Aitilin
“Phi sha te phi triem ban kren” pynphai nia u Hiram

“Te ka long kumta em, ka jingiasngewthuh ma ngi arngut. Te kumno pat heit?” ong ka Aitilin bad ka rkhie
“Balei uto pat mynshuwa ka pyni ba phim iasngewthuh” kynthah u Hiram
“Wat bret biang ia nga seh sha kito ki por ba nga sngew kum ban prie” ka ong
“Oh! kumno kumta haba u khun ruh u lah da heh katto?” ong u Hiram
“Phim kynmaw seh ba nga lah dep iathuh lut ha phi shuwa ban ia iaid bad phi bad phi ruh phi ong to ia kaba lah dep lah dep bad phi ong ruh ba phim sngew ei ei shuh ba nga lah iathuh hok” kren khia jingmut ka Aitilin
“To lah biang phi nga shu kren pyndom kai” ong u Hiram
“Ym dei ban khyllie shuh ia kita ho. Kumba phi la ong hi ia kaba lah dep lah dep” kren khia thew ka Aitilin
“To ai biang uto u kwai lah jan poi artat” u ong bad u khyrwait steering
Haba la poi ha iing ka Aitilin u shu dih tang ka sha bad leit phai noh sha la iing. U la mih na iing jong ka ha ka por 8 baje mynmiet. Marwei hapoh kali u pyrkhat ba sa tang katno sngi bad katno taiew un leit sah ryngkat noh bad ka. Ynda la poi ha iing u bamja bad haba la dei ka por thiah u leit thiah noh sha la kamra
Ka Aitilin katno ka kmen ka sngewtynnad ba kiei kiei baroh ki iaid beit khlem kano kano ka jingkren wit na ka liang ki kmie ki kpa jong u. Ka pynshong dur ha la dohnud ba u Hiram u dei u khun ba bit ba biang
Ka ring dur ia ka iing ka sem jong u, ki kamra shongkai bad kiwei kiwei de. Ka phyllaw ka mynshem, ka pyni bad pynpaw ia ka iing babit ba biang. Ka shu buh lypa ka jingmutdur tip un leh kumno ia nga bad ia ki khun hadien habud. U shu kamai niah kali kumne bad nga ruh kumne tang ka bai pynkhreh kot. Ka Aitilin ka sngew ba lada shu mutdur lypa kumne kam myntoi hynrei ka shu aiti ha ka por ba kan ialam.
Hadien shi bnai ka jingwan pynithuh iing, u Hiram u la sah ryngkat noh bad ka. Kane ka la pynkmen ia ka kmie jong ka ba u tnum u tyndai un sa roi parum pareh

Ka por ka la iaid kumba katto katne bnai u Hiram u shem ba ka Aitilin ka long ka briew kaba sngewtynnad khamtam kaba kren shai ia kiei kiei. Kane ka la pynkmen ia u
“Ia mynta te ka biang hynrei ka ban sa wan te ym lah tip. Ka jain phong dang thymmai ka sngewklai bha hynrei hadien ba la pyndonkam kam sngewklai shuh hynrei don pat kaba da juh palat kat haduh wat lada ka jot makna ruh suh syrdep shi syrdep. Tip ngan long kumba long kaba hadien?” buh jingkylli hi u Hiram ha lade

Ar snem duna ka la iaid bad ka Aitilin ka la kit khun. Haba la dei ka por kha ka la kha da i khun kynthei ym da bhabriew eh. Ka jingwan i riewblei kynthei ka la pynkmen ia ka bad kumjuh ruh ia ka kmie jong ka. [yn dang bteng]