Kam nongmihkhmat, kam dei ban sam work order, sam blanket

Albert Maring

Ka kam nongmihkhmat kam dei tang ban sam work order, sam blanket, sam tin sop iing, sam khiew, buh maw nongrim, khap ribon bad kaba leit iing iap briew. Kaba kongsan ka long ban thaw ain hapoh assembly, ban thaw ki lad ki lynti ki policy trei kam bapher bapher na ka bynta ka bha ka miat ka jing myntoi jong ki paidbah kat kum ka kyrdan bad ki jing donkam jong ki paidbah, ban long ki nongialam, ki nong kit nong bah ia ka khia ka shon jong ki paidbah, ban pyn sngew ban ia said ia ki jing eh, ki jing donkam jong ki paidbah, ban kren na ka bynta ka khyndew ka shyiap, ka riti ka dustur, ka kam iap ka kam im jong ka jait byn riew, ban thaw ki lad ki lynti na ka bynta ka lawei ka bha ka miat jong ki paidbah ka constituency, ka dong ka thain bad ka jylla, ban wanrah ia ka suk ka sain, ka synshar khadar kaba khuid, don kam ki nong mih khmat ki nongialam ban long ki nong sain dur na ka bynta ka lawei ba phyrnai ha ka imlangka sahlang.

Don ki paidbah kiba sngew thuh bakla kiba ong ngan thep vote ia u candidates uba lah ban iarap uba lah ban ai pisa ai kiad ha ka por election sngi thep vote bad u candidate uba lah ban leh kumta dei tang u candidate heh spah , lada ka jia kumta ngin sa ioh ki nong mih khmat ki bym da don ia ka mon ban shakri ban pynroi pyn par ha ki shnong ki thaw, bad kin sa long ki nong peit kai haba ki wei ki para nongmih khmat ki ia shim bynta ban ia tai ia thir ha dorbar thaw ain, ngi kum ki paidbah ngi dei ban jied ia ki briew kiba stad kiba shem phang kiba iohi jngai kiba don ka mynsiem jong ka jing kit khlieh na ka bynta ki paidbah, ngim dei ban jied mat lah , ngim dei ban pyn long blei thaw kiba lah ha ka por election ioh ngi babe hadien ba ngi la shah thied.