Pan jubab ka seng HITO, na u myntri korbar ri

Ka HITO, ka la pan jingshai, na U Amit Shah, myntri korbar ri, ka sorkar India, halor ka jingkynnoh jongu, ba kane ka sorkar MDA, ka dei ka sorkar, kaba bamsap tam ha ka Ri India hi baroh kawei bad katei ka mat, ka long kaba donkam, ia ka sorkar India, ba kan sei ia ki jingshisha, namar ba ka la tip lut, ia kitei ki jait jingbamsap (lada ki don).

Ki mat kiba la sei da U Amit Shah, ki long kiba donkam bha, ba u paidlang ka jylla, un ia tip bad kitei ki kynthup ia ka jingbam hati kit kulai jong kane ka sorkar bad nangta ia ka jingpheil jong u myntri rangbah, uba bat halade ia ka tnat pisa bad kaba la pynlong ia ka jylla, ban shu bam ram haduh ha kine ki sngi haduh T.1,849klur, katba kum ka mang pisa jong u snem 22-23.

Kam dei tang kata, hynrei U Shah, ula ther tyngeh, ia ka jing bym larkam jong ka tnat bor ding, ha kaba u ong, ba ka MeECL, kan hap ban khang khyrdep noh shen, namar ba ka jingtuh, ka jubor bha ha katei ka tnat, ba la bat da U Bah Prestone Tynsong, symbud myntri rangbah ka jylla.
Kine ki dei, na shibun tylli ki mat, kiba la sei da U Amit Shah bad kiba ula nion tyngeh, ia kane ka sorkar, ba ialam da ka NPP bad kiba katei ka seng, ka la pynbna iar, ba kan phah tohkit, ha u nongbishar ba la shongthait jong ka Supreme Court.

Kam kut tang katta, hynrei ka BJP, kaba dei ka hynmen rangbah jong ka NPP, ka dei hi ruh ban phah tih tyllong, halor ka jing pynlut ia ka khlam covid kaba poi sha ka T.816klur bad nangta ia ka skhim FOCUS, kaba ai pisa sha ki Self Help Group (SHG), kaba sam khun sniang bad khun syiar, namar ba U President jong ka seng BJP, na ka jylla, ula kren shai, ba katei kam dei ka skhim iohei, hynrei ka dei ka ram.

Ka BJP, lada kan wan ha ka sorkar synrop bad kano kano ka seng, ka dei ruh ban ailad ia ka CBI, ba kan tohkit halor ka jingkhaii tuh dewiong, ka jingshim kabu jong ki high level, halor ka kam shalan mawshun bad ka dei ban pyn urlong ia ka jingdawa jong katei ka sengbhalang, na ka bynta ban jynrat naduh dyngkhong ia kitei ki jingbamsap bad kam dei ban shu byrngem kum u laren khlem dum slap, tang ha kum kane ka por elekshon.