Haduh 140 klur tyngka, lute ka sorkar MDA,na ki paidbah haba iadei bad ka jingthied ia ka jaka ha Mawpdang

Shillong:U nongialam jong ka liang pyrshah bad u kyrtong jong ka parti Trinamool Congress na Songsak bad Tikrikila constituency, u Dr Mukul Sangma, u la iathuh ba ka ladon ka jing pyndonkam bakla ban thied ia ka jaka ha Mawpdang ha kaba haduh 140 klur tyngka da ka sorkar MDA, ha kaba u la dawa ruh ba dei ban tohkit haba iadei bad kane ka bynta.

Haba iakren bad ki lad-pathai khubor ha ophis treikam jong ka parti TMC ha nongbah Shillong, ha kaba u Dr Mukul Sangma, ryngkat u vice-president ka TMC bah James Lyngdoh bad u president jong ka TMC Students union Meghalaya, u Bansharailang Pyngrope.

U Dr Mukul Sangma u la ong ba ka sorkar MDA ka mut Meghalaya Deceitful Alliance, sa shisien pat ki la ia don bynta ban tuh na ki paidbah jong ka jylla,haba iadei bad ka jingthied ia ka jaka ba shongdor 807 akar ha ka jaka ba latip kum ka Mawkhan ba hap ha shnong Mawpdang. Ka jingthied ia ki jaka ka long ha ka dor 45 tyngka shi square feet na ki na ki trai jaka, katba ka jingsiew pat ka long haduh 85 tyngka shi square feet.

Ka dor la rai da ka kynhun myntri sorkar ha ka jingialang ba la pynlong ha ka 4 tarik Naiwieng 2022, ha kaba u myntri ka tnat pynroi sor u la buh jing tyrwa bad la mynjur ruh da ka tnat revenue, baroh ki myntri sorkar bad u Myntri Rangbah jong ka jylla.

Katkum ki jingioh lum jingtip, lyngba ki jingthoh ka paw shai ba lai ngut ki briew kata u Myntri Rangbah, Myntri ka tnat revenue bad u myntri ka tnat pynroi sor ki la don lypa ka jingiasuh buit ban lute na ka jylla ha ka dor kaba heh shibun ,kata haduh 140 klur, ba dei ban siew sha kito ki trai jaka, la ong u Dr Mukul Sangma.

U Dr Sangma u la kyntu ruh ia ka sorkar pdeng ba kin peit bniah halor kine ki jing kynnoh na ka por sha ka por, ha kaba u la ong ruh ba ka jing kren jong u Myntri tnat kam pohïing jong ka ri ba ka jylla Meghalaya ka dei ka jylla ba nyngkong duh ha ka bamsap, kane ka pynjah burom ia ka jylla bad ia ki nong shong shnong, namar ka bamsap kam dei satia ka lynti ba ngi im namar ki paidbah jong ngi kim dei kiba la lot, hynrei ngi kyntu ia u Amit Shah ba un shimkhia ha ba iadei bad ki jingkynnoh ban thung ruh ia ka kynhun tohkit ,u la iathuh.

U nongialam jong ka Liang pyrshah u la iathuh ruh ba ka bamsap thied jaka ka dei sa kawei pat ka kam ba ka MDA ba ialam da ka parti NPP-BJP ka la leh nalor kiwei pat,kum ka bamsap Subhagaya, ka bamsap smart meter bad ka jingkhyllem jong u Dome ka ïingdorbar thawaiñ jong ka jylla Meghalaya.