Shah jied u Ainam, kum u Syiem ba pura ka Hima Mylliem

Shillong:U Acting Syiem jong ka Hima Mylliem Paiem Ainam Manik Syiem, hynnin ka sngi nyngkong, ula shah jied kum u Syiem ba pura jong ka Hima Mylliem ha ka Elekshon kaba la pynlong hynnin ka sngi, da ka tnat Elaka jong ka Khasi Hills Autonomous District Council (KHADC).

Ha katei ka ilekshon Syiem Hima Mylliem, kila don 5 ngut ki kyrtong kiba la thep kyrteng ban ïakhun ïa ka ilekshon bad na ki 41 ngut ki nongthep vote, kila don 10 ngut kiba la pep ban thep ïa ka Vote bad kiba sah 31 ngut baroh kila thep vote bad jied ïa u Paiem Ainam Manik Syiem kum u Syiem ka Hima Mylliem.
U Bah C Pohlong uba long u Returning Officer uba pynïaid ïa katei ka ilekshon, ula ong hadien ba la pyndep ïa ka jingjied ïa u Syiem, yn sa phah ïa ka kaiphod ïa kaba yn sa rah ha ka dorbar ban wan jong ka Council bad hadien kane, ka Council kan sa aiti ïa ka sanad ha u Paiem Ainam Manik Syiem.

Kiwei kiwei ki kyrtong kiba la ïakhun ïa katei ka ilekshon Syiem ki kynthup ïa u Bah Samran Sing Syiem, Bah Pynshailang Syiem, Bah Banteilang Syiem bad Bah Mansan Manik Syiem.