U Dasakhiat u la wanrah shibun ki kam pynroi ha Mawhati, ong ka NPP

Nongpoh: Ki nongialam ka NPP Mawhati, ki la pynpaw ia ka jingsngewsih kaba jur eh halor ka jingshah kynthoh palat pyrshah u Dasakhiatbha Lamare, MLA barim ka Mawhati Constituency bad uba mynta u la leit ban aireng noh na Nongkrem Constituency ha kane ka jingjied nohmihkhmat sha Iing Dorbar Thawain.

Kitei ki nongialam ka NPP ha Mawhati, kiba kynthup ia u Bah Donbok Kharnaior, General Secretary ka NPP Mawhati bad u Bah J. Kharkongor Rangbah Shnong ka Mawhati, ki la ong ba u Dasakhiatbha Lamare, u la lehbha palat eh ia ka Mawhati bad uba la lah ban tam ban ia kiwei ki nongmihkhmat barim ka Mawhati Constituency. Haba pynshai halor ki kam ba khraw ia kaba la lah ban wanrah da u Dasakhiatbha Lamare, kitei ki nongialam ka NPP, ki la ong ba kita ki kynthup ia ka surok na Umsning sha Sonidan, nangta ka surok na Liarbang sha Mawlasnai, nangta ka surok na Liarbang sha Khyndewso bad ka na Laiphewdiengngan bad mih sha Umroi, kiba dei ki surok kiba donkam tam eh na bynta ka Mawhati Constituency.

Nalorkata, ki la pynpaw ruh ba u Dasakhiatbha Lamare, u la lah ban wanrah ia shibun ki kam pynroi, kiba kynthup ia ki skul lem bad kiwei ki jait kam pynroi ha ki shnong ki thaw, ha kaba lada khein kyllum lang ia baroh ki kam pynroi, ki la poi sha ki spah klur.