Shillong: Ki nongialam Khristan na ki jaka bapher ha Assam bad ka thain lam-mihngi ki la iakynduh lang ha Guwahati myn Sngi Thohdieng 14-tarik u Rymphang 2023 da ka jingiakut ia ka jingialong kawei hapdeng jong ki bad kito baroh kiba shah lehbein.
Kane ka jingialang ka la pyn kynmaw ia ki jingjia pyrshah ia ki Khristan ha ka ri jong ngi ki ba kynthup ia ki kyntien-jingshun, ki jingshah ibein bad jingshah leh jubor jong ki riewngeit shimet bad ki kynhun kaba kynthup ruh ia ki jingpynjot bad jingpynjah burom ia ki jingtei bad ki jaka mane Blei. Ki kam sniew kum ka jingpyniap ia u Graham Staines ha Odisha kumba 20-snem tam mynta, ki jingjia ba shyrkhei pyrshah ia ki Khristan ha Kandhamal ha u snem 2008 bad kiba bun kiwei pat ha ki jaka bapher ha ka ri khamtam ha kito ki jylla ha kiba ki bor synshar ki sngap jarjar kum kiba ai jingmynjur pynban ia ki nongleh kam bymman.
Ha kine ki khyndiat snem kine ki kam pyrshah ia ki Khristan ki la nang kham jur eh bad kham bun ruh, bad dang shen ka don ka jinglum kyrteng ia ki Khristan shimet, ki longiing jong ki bad ki kynhun Khristan ha ka jylla Assam. Da kaba ai daw ban beh ia kiba wan buhai shnong ha ki khlaw Sorkar, ka la don ka jingpynjot ia ki iingmane bad ki jaka shong briew ha kaba da ki spah ki nongshong shnong na ka jaidbynriew Boro kiba long ki trai shnong trai muluk, ki la kylla long ki phetwir ha la ka jong ka jaka. Ha kajuh ka por pat ym lah khlem da bishar ia ka jing-ai noh da ki spah acre ki jaka bad spah khyndew sha ki briew bad kynhun hehspah kiba long nongwei ha kane ka thain jong ngi. Kane ka long ka jingkhniot bein ia ka ioh ka kot jong ki kynhun bynriew kiba ritpaid bad tlot bor da kiwei pat kiba khlain bor bad kiba ialeh ban iai bat ia kata ka bor jog ki ha ki katto katne ki jaka ba donkam. La don ruh ka jingpynsngew sheptieng da ka jingbyrngem ban weng noh ia ka hok jong ka Scheduled Tribe na ka bynta ki Khristan ka ban long ka jingpynduh noh ia ka hok jong ki nongshong shnong tynrai jong ka ri kat kum ka Constitution ong ka Ri India.
Katba ki bor Sorkar ki la kyntait ia ka jingdonkti jong ka Sorkar ban tuklar halor ka jingjied jong ki briew shimet ia la ka jingngeit bad jingmane Blei, pynban ki Balang bad ki kynhun Khristan ki dang iai iakynduh ia kine ki jingdawa bad jingmaham.
Ki jaidbynriew ha kane ka thain lam-mihngi ki lah juh don ka jingburom ia ka jingjied shimet jong ki briew ia ka jingngeit niam bad kiwei de ki dustur rukom im, bad kim juh tuklar ia ka rukom im jong kiwei pat ha ki bynta bapher jong ka ri India. Ki kam sniew kum ka jingpyniap briew bad ki jingleh bein kim juh don ha ka rukom im jong ngi. Ki rukom pynjot da ka bor bad ki jingkyndang jubor ki long tang ki atiar jong ka jingleh niewbein bad ka jingkhaweit.
Ha ka jingjied nongmihkhmat kiba long mynta u bnai ha Tripura, Nagaland bad Meghalaya, kane ka jingialang ka khot ia baroh ki nongshong shnong ban long kiba phikir bad peitngor halor ki jingbyrngem ban pynduh ia ki jinglaitluid kiba ka Riti Synshar jong ka Ri Inda ka ai na ka bynta baroh ha ka Ri. Kane ka jingialang ka khot ruh ia ki para Khristan ban ym kylla-dien na ki jinghikai ban bat ia ka jingshisha, ka hok bad ka jingleh hok khlem jingpyniapher. Ym dei ban shah pynbiej ha ki jingkular bad jingaisngewbha kiba tang shiteng por. Kum ki nongthep votengi dei ban sngewthuh ia ka jingkordor jong kane ka bynta, bad da kaba bishar bha bad ka jingiatiplem kaba khuid ngi dei ban jied ia ki briew kiba don ka jinglah, kiba bat ia ka hok, kiba isih ia ka jingbamsap, kiba don ka jingshaniah bad ka jingaiti na ka bynta ka jingialong kawei bad ka jingbha jong ka imlang sahlang bad jaidbynriew jong ngi.
Ki nongialam kiba la iashimbynta ha kane ka jingialang ki dei na ka National Boro Christian Council (NBCC), Assam Baptist Convention (ABC), Boro Baptist Church Association (BBCA), Karbi Anglong Baptist Convention (KABC), All Manipur Christian Organisation (AMCO), Catholic Church, UCF Karbi Anglong, Nagaland Joint Christian Forum (NJCF), North Bank Baptist Christian Association (NBBCA), Khasi Jaintia Christian Leaders Forum (KJCLF), Christ Church Guwahati (CNI), Assam Christian Forum (ACF), CCFNEI, Boro Baptist Convention (BBC), ong ka kyrwoh, na U Rev Dr EH Kharkongor, Recording Secretary.
Ngi donkam ban iatylli para rit paid jing baroh ka thaiñ shatei lammihngi ki dkhot jong ki kynhun nijam bapher2 ban ioh jingpynsngewthuh iaki paidbah baroh khnang ban nym jied iaki candidate kiba wan pynbeij election da kine da kitei tang ban jop iaka election ka jong ki. Namarkata husier ko ki paidbah jong ki jylla bapher2, khnang ban nym ngop ha ki briew kiba thmu sniew.