Bam duh ka ding ia 4ngut ki mynsiem briew, na ka jingpluh ka iing ha Mawlam

Shillong:Ka la don ka jingpluh ding kaba shyrkhei, mynta dangstep phyrngab ha ka shnong Mawlam, kaba don harum Pynursla, ha kaba kawei ka iing shong briew, ka la ingkhong khait, na ka jingtrei jubor jong ka ding.

Ha katei ka jingjia, u kpa jong ka iing lem bad 3ngut ki khun, ki la duh ei, ia la ka jingim.
La iathuh ba U Bah Etan Tangsong, uba don kumba 45 snem ka rta, ula khlad ha katei ka jingpluh ding ha ryngkat bad 3ngut ki khun jongu, ba kynthup ia arngut ki khun shynrang. Uwei na kiba iap, u dei U Killer Khongkhnian, uba 10 snem ka rta, U Bhaman Khongkhnian uba 6 snem ka rta bad ka Elimai Khongkhnian, kaba dang 4 snem ka rta.

Ka kmie jong katei ka iing, ka la lait na ka jingjia ba sngewsih, namar ba kam shym don lang satia ha katei ka iing, ha katei ka miet, ong ka khubor.La iathuh ba ka jingpluh jong ka iing, ka dei na ka jingpur jong ka ding, na ka dpei jong ka iing.

Na ka liang, U bah Eming Khongngai, Vice President jong ka seng UDP Pynursla Circle, u la leit sngewlem sha katei ka longing mynta ka sngi, ong ka khubor.