Ka BJP, ka la mih noh na ka kynhun MDA

Mynta ka la shai kdar, ba ka BJP, ka la ia khlad paralok noh bad ka para khadduh jongka; ka NPP, ha kaba ia katei ka khubor, la pynbna hi, da U Amit Shah, uba dei u heh duh jong ka seng BJP, ha kaba ula kren ha ka jingialang bah ha Tura, ha ka sngi palei.

Katei ka rai jong ka BJP, ka dei ka rai kaba pynduh mynsiem shi katdei eh ia ka NPP, namar ba katei ka seng, ka ju leit khem khohwah man ka khep, ia ki heh ki hain sha Delhi, na ka bynta ban ioh ia ki kam pynroi ha ka jylla bad ka ju don ruh ka jing angnud, ba ka Agatha Sangma, kaba dei ka MP ha Lok Sabbha, kaba la kyrshan ia ka CAA, ba kan ioh ia ka shuki myntri ha ka sorkar India.
Da ka jingshah kynjat jong ka NPP, ha ka hynmen rangbah jongka, ka la kdew shai, ba katei ka seng, kan kylla long lem noh, tang kawei ka seng rit bad kan duh noh ia ka jingkitbok jong ka BJP, ha ki jingtreikam jongka nangne shakhmat bad kaba ima shibun, ba ha kane ka sien, kaba mynta, kan lah ban kylla biang, kumba ka la jia ha u 2013 sha ka jingdon, kaba tang 2ngut ki MLA.

Kam dei tang katta, ka jingkren jong U Amit Shah ha Tura, kaba dei ka ktem jong U Conrad Sangma, nongialam ba heh duh jong katei ka seng, ka long ba kane ka sorkar NPP, ka dei ka sorkar kaba bamsap tam ha ka Ri India hi baroh kawei bad ula pyni ruh da ki jingkhein jingdiah kiba biang bad kitei ki kynthup, ia ka tnat MeECL, ha kaba ula kam, ba katei ka tnat ka don ha tmier jong ka jingkhang dam noh jongka bad nangta, u pyni shuh shuh ia ki jingkhein, ba la pynmih da ka Reserve Bank of India (RBI), ba ka Meghalaya, ka don ha ka jinghiar kaba sha trai duh, ha ka jinglong ka ioh ka kot bad u pyni, ba kane ka sorkar, ka don ha ka jingduna pisa (deficit) kaba T.1,849 klur, katba kum ka jingkhein jong u snem 2022-23 bad ba u pynpaw, ia ka jingsngewkhia, ba kum kane ka jylla, kaba rit, ka long kaba ima shi katdei, ba kan don ha katei ka jingshah kit ram, kaba kattei.

Ka jingkren U Amit Shah, kam dei satia kaba rit, namar ba u dei u myntri jong ka sorkar India bad nangta, u dei ruh uba khyrwait shabi ia ka sorkar Meghalaya; namar ba lada ka kren ka Congress, ka TMC lane wat ka UDP, kam da khia thew satia haduh katta katta, hynrei, haba kren uba tip lut, ka pyni, ba ki jingshisha ki paw tyngkrein.