Sei madan u heh pulit, ia ka jyrsih ha katei ka tnat

U Bah GK Iangrai, uwei na ki heh pulit ka jylla, uba la shah kem, ha kiba bun ki jingshah kynnoh, ula sei madan ia shibun ki jyrsih, ha katei ka tnat, hadien ba ula lait jamin na ka kashari, hynrei, ula shah kem biang pat, hadien katto katne por, ba u lait na phatok.

Ka jingjia, ia utei u heh pulit, ka long kaba jyrwit shibun eh, namar ba ula shah kem, halor ka kam thied kali beain bad nangta, la iathuh shuh shuh, ba ula shah kem halor ka jingthaw ia kawei ka iing pulit bad sa kiwei ki daw bad la sngewthuh ba utei u heh pulit, ula don ka jingsngew dukha mynsiem, halor kine ki jingjia.

Katba ka jia; kane ka kam, ka la poi sha ka kashari, ba heh duh jong ka Ri bad kumta, utei u heh pulit barim, ula dei ban long adkar ialade bad ula dei ban iaid katba kum ki kyndon jong ka ain, wat lada u don ia shibun ki jing kynnoh, kiba u sngew shongnia, ban ther ia ki para pulit jongu lane ia kita ki high level, kiba ula kynnoh bad ula dei ruh ban buh da ka ejahar, kaba iahap, lada u don ia kiwei ki jingshisha.

Mynta kaba utei u heh pulit barim, u dang thawlad, ka long, ba un pyllait shwa ialade, na ka jingshah set phatok bad imat, un da lait phatok, u don pleng ia shibun ki khana, kiba u kwah ban sei madan, halor ka jingtrei kam jong katei ka tnat hi baroh kawei.
Lyngba ka jingsei madan jong U bah Iangrai, kan long kaba donkam bha, ia U DGP lem bad katei hi ka tnat baroh kawei, ba kan peit bniah bha, ia ka jinglong jingman ha katei ka tnat bad ban wad ia ki jingshisha, namar ba uba sei madan, u dei hi, da u briew, uba dei napoh jong katei ka tnat bad uba la bat kum U Assistant Inspector General of Police jong ka jylla.

Kine ki jingjia, ki la pynjah burom bad pynduh ia ka jing shaniah jong u paidlang ka jylla, ia ka tnat pulit hi baroh kawei bad kumta, ka la dei ka por, ia katei ka tnat, ba kan peit bha, ia ki jingtrei kam jongka, ha ka jylla hi baroh kawei, namar ba kan nym jia shuh, ka jingleh kam beain da ki pulit, lada dei halor ka jingsiat pathar ia ki riew lui lui, ka jingleit sei ia ki briew na ki iing jongki, ha ka miet ka dum, ka jinglum pisa jubor na ki trok (kumba la long high level) bad nangta, sa ka jing pyndik ia ka leit ka wan jong ki riew paidbah, ha ki rukom bapher.