Ka jyrsih bamsap, ka sorkar jylla; na ka khlam covid

U Bah Adelbert Nongrum, MLA barim jong ka North Shillong, ula ujor ejahar, halor ka jingjah rngai jong ka pisa kaba T.43klur, kaba wan na ka sorkar India, ha kaba iadei bad ka jing pynlut na ka khlam covid bad ka jing ujor, U bah Nongrum, ka dei, halor ka jingbym iahap jingkhein, ia ka pisa, kaba la pyni, da ka sorkar jylla bad ka jingkhein, kaba la pyni, da ka sorkar India, katba kum ka jingwad jingtip paidbah.

Haba jubab ha iing dorbar jylla, U James K Sangma, myntri ka tnat ka koit ka khiah, u pyni, ba ka jingpynlut jong ka sorkar jylla, ka long T.816 klur, ia ka khlam covid bad na katei ka pisa, la pyni, ba ka sorkar India, ka ai T.76klur, katba ia kaba tam nangta, lane kaba long T.739klur, la bei da ka sorkar Jylla.
Katei ka jingkhein hi, ka la dei ban pynkyndit ia ki nongshong shnong jong ka jylla, ba kum kane jylla, kaba duk tasam, kaba shu ap rhing na ka sorkar India, ia baroh ki jingdonkam, ba kan pynlut haduh T.739klur na la ka jong ka pla bad la ioh jingkhein, ba ka sorkar Jylla, ka pynlut haduh T.1.9klur ha ka shisngi, ha ka khlam covid, katba ka Manipur, ka pynlut tang T.105klur ha katei kajuh ka thma pyrshah covid.

Kam dei tang katta, kaba U James K Sangma, u iathuh, ka long ruh ba ka jinglut, kaba bun, ka dei ha ki jingthied, kiba pyn donkam noh (non infrastructure), ha kaba la pynlut haduh T.769klur, katba ha ki jingtei iing, la pynlut tang T.49klur.
Lyngba ka jingai ejahar jong U bah Nongrum, ka la donkam, ban sei madan ia katei ka jyrsih, kaba T.816klur (kumba ka la jia ia ka jingthied kali jong ka tnat pulit) bad katei ka kam, kam dei ban kut tang ha ka tnat pulit, hynrei, ka la dei ban poi sha ka kashari, ha kaba ka High Court, ka dei ban sei madan, ia kiba ioh ia ka dohkshong lane ka doh pasoh, na katei ka pisa corona.

Kan jin da la bha shibun, lada U Bah Nongrum, uba la shimti ia katei ka kam, ba un nym pynkut, tang ha ka jingujor ejahar, hynrei, u dei ban tih shuh kham jylliew, halor katei ka jingpynlut phut jong ka sorkar jylla bad lada un wan phai biang, kum U MLA jong ka North Shillong, u dei ban khynra naphang ia ki myntri sorkar lane ia ki ophisar, kiba don ia syllang lang, ha katei ka jingtuh kaba jubor tam jong katei ka tnat.