Shillong:Ka Animal Welfare Board of India (AWBI) ha ka sngi Thohdieng ka la weng noh ïa ka jingkyrpad ban rakhe ha ka 14 tarik mynta u bnai kum ka Sngi Kdup Masi ne ka ‘Cow Hug Day’ hadien ba la ïoh ka jingbthah hapdeng ka jingshah pynrem kaba la saphriang bun bha hapoh ka social media.
Ka jingweng noh ïa katei ka jingkyrpad ka la tang shisngi ba u myntri ka sorkar pdeng u Parshottam Rupala u la ong ba kan long kaba bha lada ki briew ki kohnguh ha ka rukom badei ïa ka jingkyrpad jong ka board ban rakhe ïa ka 14 tarik mynta u bnai kum ka ‘Cow Hug Day’.
Lah ban ong ba manla u snem ha ka pyrthei baroh kawei la rakhe kum ka sngi Valentine’s Day.
“Kumba la bhah da ka bor sorkar bad ka Ministry of Fisheries, Animal Husbandary and Dairying ïa ka jingkyrpad ba la pynmih da ka Animal Welfare Board of India na ka bynta ka jingrakhe ïa ka Sngi Kdup Masi ne ka Cow Hug Day ha ka 14 tarik mynta u bnai, 2023 la wengnoh ïa katei ka jingpynbna,” ong u Secretary ka board u S K Dutta ha ka jingpynbna ba la buh hapoh ka website.
Lah ban ong ba kan dei ha ka sien kaba nyngkong eh ba ka AWBI ka la kyrpad ïa ki riew ieid Masi ha ka Ri ba kin rakhe ïa ka ‘Cow Hug Day’.
Phi don ban ong eiei?