Ki CRP, kin pahara ha krem dewiong

Ka ktien high level, ka dei ka ktien, kaba ki ju pyndonkam bha ha kine ki sngi bad ka dei ruh, halor kane ka kyntien, ba ki heh jong kane ka sorkar synrop, ki ju saitkhuid bha ialade, ba kynthup ia U Conrad Sangma, myntri rangbah ka jylla, ba ki ju ong “Haei kita ki high level, ai ia ki kyrteng jongki, lane wan rah ia ki hangne” bad kitei ki kyntien, ki dei ruh ki ktien thombor, ba ki trok kit dewiong, kin iaid pyllein pyllein mynsngi mynshai bad ka tap tyrpal bad kaba kham sngewjli sat ban tip bad kata ka long, ba ki iaid da u lain ter ter bad ba ki thok im im peit peit, da kaba ong, ba ki dei kiba kit dieng, katba ynda la kyllon ha surok, ki dieng ki kylla dewiong.

Ka Meghalaya High Court, ka la duh jingshaniah ia kitei ki kyntien jler bad ki kyntien thok jong ki heh kane ka sorkar, kaba la leit noh bad ka dei na kata ka daw, ba ka la hukum ia ka sorkar India, ba kan wan rah da ki pulit CRP, ba kin leit pahara sha ki ktem dewiong bapher ha ka jylla.
Katei ka rai jong ka high court, kan ktah jubor ia ka pla jong u paidlang ka jylla, namar ba nalor ba la shah tuh u dewiong na ki par bapher, katba nangne shakhmat, yn hap ban siew, sa ka bai leit ap jong kitei ki pulit ka sorkar India bad katei ka dei ka jingshah nion bein, ka bym lah batai shuh.

Ka High Court, ka la duh jing shaniah jur, ia kane ka sorkar bad ka la sdang ban tian bishar, ia u SP jong ka East Jaintia hills bad kane ka dei ka jingjah burom, kaba khraw tam, ia ka sorkar jong U Conrad Sangma, namar ba ka kashari, ka bym ju leh shiliang khmat, ka la pynmih ia katei ka hukum kaba tyngeh shisha bad ba ka kren sngewsih kthang, ba u dewiong uba haduh 13lak metric ton bad sa da ki phew phew lak MT, ba la shu kit beain na ka jylla, khlem kano kano ka kyndon.

Ngin dang ia peit ia ka jing bishar, kaba dang bteng nangne shakhmat; hynrei, ngin hap ban tip, ba kane ka kam, ka don mynta ha ka jingpeit pyrman jong ka National Green Tribunal (NGT) bad ka Meghalaya High Court bad lyngba ka jingtian bishar jongki, ia U SP ka Jaintia hills, khlem pep, kan plie lad ba kin nang ngam jylliew shuh shuh, ban sei kyrteng ia kitei ki high level, kiba la pynjot thiaw ia ka kamai kajih, u duk u rangli jong ka jylla hi baroh kawei, da kaba ki klun tang halade, ia katei ka sbah bym hok.