Ha ka jing pynkhreh ia ka elekshon 2023, la iohi, ba ki kyrtong ialeh MLA, ki ju kren ne jubab ia ki jingkylli jong ki kot khubor bad la iohi, ba u kyrtong, uba nang ban kren, u ioh jing iaroh; katba u bym nang, u shah kynthoh ne shah kren bein ha ki comments jong ki nongpeit lane ki nongpule ia ki khubor bad ngi iohi namarkata, ba ha kane ka juk social media, ba ka bor jong ki kot khubor, ka la khlain shi katdei, ha kaba ki lah ban pynlong syiem, ia uba ki sngewieid bad ki lah ban pynkylla baji, ia uba ki ijli.
Kam dei ruh tang katta, la iohi, ba ki kotkhubor, ki ju sngew bang ruh ban pyn ia lympat, lyngba ka jing ia patied nia, hapdeng ki riew sain pyrthei bapher, da kaba ki pynkylla ishu, ia ki jingkren jong ki riew sain pyrthei bad ba ki leit kylli, ia ka jingkren jong u liang synshar sha u liang pyrshah lane u liang pyrshah sha u liang synshar bad kumta ki politician, ki shu shah phyrnop, ha ka jingtriem ki nongthoh khubor, ban pynshah shrieh halor ki ishu bapher.
Ki la don bun ki riew sain pyrthei, kiba shu thad ei, ia la ka jong ka jingbieit bad kiba shu thad tad dor, wat ia la ka jong ka longiing longsem, tang namar ba kim nang ban tyngkan ia la u jong u thylliej, haba kren sha ki kotkhubor bad la iohi ruh, kumba ki don kiba sngewbang ban mih ha ki dak kiba heh ha ki sla khubor, wat lada ki la die noh, ia la ka jong ka mynrain ha uba bun balang.
Ban die burom ne ban thad burom, ia la ka jong ka long rynieng, ka shong ha ka jingsngew jong u briew hi shimet, hynrei, ka jingdon jong ki social media, ha kine ki sngi, ki la plie lad ia u paidlang ba bun, ba un ia nujor sani bha ialade, ia ki nongialam bapher, kiba don ha ka jylla, ha kine ki sngi bad nangta ban jied shiah ruh, ia ka ktien ka thylliej jongki bad ban bishar, la ki long kiba bit ne em ba kin long ki nong mihkhmat jong u paidbah.
Ka elekshon komishon, ka la dei ban ai shuh ia ka bynta kaba kham heh ia ki kotkhubor, ha ki sngi ban sa wan bad kata ka long, ban pynlong ruh ia ka jing ia tainia markhmat jong ki kyrtong, kumba ki ju leh ia ki kyrtong ha America, England bad ha kiwei de ki ri sepngi ba ki nongjied, kin iohi, ia ka jingtbit jong ki kyrtong bapher.
Phi don ban ong eiei?