Lada jop ka BJP, nga la long MR lypa, ong U Bah Hek

Shillong:U nongïalam ka Bharatiya Janata Party (BJP) bad kyrtong na Pynthorumkhrah constituency, u Bah A. L Hek, mynhynnin ka sngi, ula kren da kaba shai kdar ba lada ka BJP ka ïoh ban thaw sorkar hadien ka elekshon, la thikna ba un ïoh bat ïa ka shuki Myntri Rangbah ka jylla.

U Bah Hek ula pynpaw ïa kane ha dien ka jingwan thep kyrteng kum u kyrtong sha ka ilekshon MLA-2023, ïa kaba la synran da u Myntri ka Sorkar Pdeng Dr Jitender Singh ba khmih ïa ka Ministry of Science and Technology.
U Bah Hek ula ong ba ka mat ba ha khmat eh ban ïakhun ha kane ka ilekshon mynta ka kynti kadei kumno ban thaw ki lad lynti ïoh kam ïa ki khun samla ka Pynthorumkhrah constituency bad ka jylla baroh kawei.
U Bah Hek ula ong ba ki paidbah ka constituency bad ka jylla kila sdang ban pdiang ïa ka BJP namar kila ïohi ïa ki kam ba ka BJP ha ka jingïalam u Myntri Rangbahduh ka ri, u Narendra Modi ka la leh na ka bynta ka ri bad ka jylla.

“Namar ka jingshaniah bad ka jingkyrshan ki paidbah, nga thikna ba ngan jop biang bad nga kyrmen ruh ba ka Party kan jop bun ki kyrtong ha kane ka ilekshon, lada ka BJP ka thaw sorkar hadien kane ka ilekshon ban wan, ngan shimti kum u Myntri Rangbah ka jylla,” ong u bah Hek.
Haba ïadei bad ka jingkynnoh ba kum u MLA u khlem lah ban trei bha na ka bynta ka constituency, u Bah Hek ula ong ba lada ki paidbah ki ïohi ba u MLA u khlem leh eiei na ka bynta ka constituency, kin nym pynjop ïa u haduh 5 sien.

Ula ong ba ha ka ilekshon kin mih beit ki jingkynnoh hynrei ki paidbah ki long kiba stad bad ki ïohi ïa kaei ka ba ki nongmihkhmat ki leh na ka bynta ka constituency bad ki paidbah nongshong shnong.
Nalor kane u Bah Hek ula ong ba lada ka BJP ka ïoh thaw sorkar bad ka ïalam ïa ka sorkar hadien ka ilekshon, ka sorkar BJP kan sdang ïa ka jingtohkit pyrshah ïa ki ba shah kynnoh kam bamsap.
“Lada ka BJP ka ïoh ban ïalam ïa ka sorkar jylla, tang hapoh 90 sngi kan sdang ka jingtohkit pyrshah ïa ki jingkynnoh bamsap bad nga kular ha phi baroh, ba baroh kiba shah kynnoh bamsap kin ngat katkum ki kyndon ka aiñ,” ong u Bah Hek.