Ka TMC kan poi sha ka thong ha baroh kawei ka jylla, ong u bah Charles

Shillong:U President ka Trinamool Congress, Meghalaya bad kyr tong ka Nongthymmai konstitwensi u Bah Charles Pyngrope, mynta ka sngi nyngkong, ula kob ba ka party kan poi sha ka thong ym tang ha Nongthymmai, hynrei ha baroh kawei ka jylla.

Haha kren hadien ka jingwan thep kyrteng, u Bah Charles ula ong ba kum u kyrtong ula pynkhreh bha bad lyngba ka jingkyrshan ki paidbah, u dang kyrmen beit ba un wanphai biang kum u MLA ka Nongthymmai konstitwensi.
U Bah Charles ula ther ruh ïa ka National People’s Party (NPP) kaba la kynnoh ba ka skhim WE bad MYE Card ka dei Baki Card, da kaba ong ba ha West Bengal ruh kine ki skhim ki treikam bad ki seisoh bha bad na ka liang ka AITC kan leh kumjuh ha Meghalaya lada ka wan ha ka bor hadien ka ilekshon.

Ula ong, “Ia kaba mynta, ka AITC kam pat don ha ka bor, ym dei ban kynnoh ba ki skhim WE bad MYE Card ki dei ki skhim ilekshon, dei ban kynnoh hadien ba ngi wan ha ka bor bad lada ngim lah pyntreikam ïa kine ki skhim,” la ong u Bah Charles.
Ha kaba ïadei bad ka jingkynnoh ba ma u lem bad u Dr. Mukul Sangma kin mih noh na ka AITC ban ïasoh sha ka BJP hadien ka ilekshon, u Bah Charles ula ong ba ki jingkynnoh kin sah ki jingkynnoh.