Khluit tar, ka skhim pressure cooker

Ka jingleit sam pressure cooker jong u Bah Mohendro Rapsang, kandidet jong ka seng NPP bad sa ka jingai bowl jong U bah Paul Lyngdoh, kandidet UDP, ka la pynkhluit tar ia ka rynsan social media, hadien, ba kawei ka longkmie, na Lumdieng jri, ka la kyntait bad leit pynphai noh, ia kitei ki jingai sngewbha jong kitei ki arngut ki kyrtong.

Kin don bun, ki ban iaroh, hynrei, kin don ruh sa shibun, ki ban kynnoh, namar ba katei ka longkmie, ka kyntait ia katei ka jingai sngewbha (lehse) kaba shongdor da ki 4,5 hajar tyngka bad ka ban pynsuk ia ki longkmie, ha ka shet ka tiew.
Haba kren ia katei ka mat, ka la dei ruh, ba ngin ia kynmaw, ia ka jingkren jong uwei na ki nong ialam UDP, ha kaba ula kynthoh ia ki skhim jong U Conrad Sangma, myntri rangbah; ha kaba ia ka skhim nongrep, u leit sam sha ki nongsor, ki bym don jaka, wat tang shitda ruh bad kane ka pisa, lehse, ka kylla pynban sha ka skhim ban thied pressure cooker.

Katei ka jingjia, ha kat ka Constituency jong ka Shillong West, kaba dei hapdeng jong ka sor bah, ka pyni, ba ka dei tang ka buit ban pynbieit ia ki paidbah, da itei i skhim pressure cooker lane i skhim bowl bad katei ka pyni, ba ka dei ka jingniew bein ia ki nongjied lane ioh lehse, ba ki kwah pynban, ia kitei ki skhim pynbiej elekshon, ha shwa ban thep vote.
Kat haduh mynta, ka tnat pyniaid elekshon, kaba bunkam ban khynra pisa ha surok bah, kam pat shym la shim rai satia, halor katei ka jingshisha, kaba la paw tyngkrein bad lada dei ba katei ka tnat, kaba don shyieng budlum, ka dei ban phah talasi sha ki iing bapher bad ka la dei ruh ban hukum ia U Rangbah Shnong, ba um dei ban shah ia ki briew kiba nabar dong, ba kin ia rung ia mih, ia iaid ia ieng, khamtam, ynda la dei ka por miet.

Kam dei tang katta, ka tnat elekshon, ka dei ban ai khusnam mardor ia katei ka longkmie bad ban pynlong ia ka jingleh burom bad ban ailad ia ka, ba kan iaid sha ki shnong ki thaw, kylleng ka Ri Khasi Jaintia, ba kan hikai ia ki paidbah, ba ka jingsam pressure cooker, lane sam bowl, kam dei satia tang ha shwa ka elekshon, hynrei ka dei ha ki san snem ba ladep bad kam dei tang katta, hynrei ka jingtrei kam U MLA/MDC kam kut satia, tang ha i skhim pressure cooker/bowl, hynrei ha ki ain kiba kongsan, ia ka bha ka miat u paid ka jylla.