HA KA KUTLAD

P.B.S

[ba bteng] “Nga kwah eh te khun ban iohi noh ia ka longiing longsem thymmai jong phi kaba i skhem ym shuh kum kane kaba lah jia kumba shu hap kumba rah ka lyer. Ban kynmaw ia ka mynnor nga kthang palat hynrei nga ngeit ba ka mynta kan pynthiang noh. Tangba nga shu hun noh ba ym dei tang ma ngi ba ngat kum kane ka apot hynrei byllai khamtam ha kane ka Bri Hynniewtrep jong ngi. Kane ka jingbun eh ki khun pongka ka pynsniewdur ia ka imlang ka sahlang bad ka siat pharshi ia ka jinglong lyngkar ka imlang sahlang jong ngi. Kane ka pyni ia ka jingbym don ka jingkit khlieh ia ka shongkha shongman hynrei ka phalang pynban ba la shu shim tang ka kam leh sngewbha. Nga ngeit ba ka kam jong phi kan iaid beit haba nga peit thuh ia ka jingiadei jong phi bad uto u bah” pynpaw u kpa
“Ka jingiadei jong ngi te ka la biang bha bad la parpain janai. Kane ka long tang ka jingleit pynithuh jong i ia nga ha la ki kmie ki kpa. Ka dei hi ka rukom kaba baroh baroh ki ju leh kumta. Baroh arliang kin sngewthuh hi kumba sngewthuh na ka iing jong ngi. Lada phai ha ki liang baroh ngi la biang pura ha ka rta shongkha shongman. Nga sngewrem khyndiat ialade ba nga la dep iaid lyngba bad la mih soh ryngkat. Ma i lei lei im pat don dak ei ei ka ban paw shabar” pynpaw ka khun.

“Wat ju bun jingpyrkhat leit beit kumba la dep iakren kumto” ong ka kmie bad ka saham samthiah
“Ia leit thiah noh lah biang nga ruh nga la samthiah palat” ong u kpa bad u peit por na ka baje kti kaba la jan dap artat 11:30 mynmiet
Ka sngi leit ka la poi. Ka Aitilin ka sem da ka jain kyrshah rong jyrngam jngum bad ka da pyniahap lang naduh sweater bad ka juti ka bym da jrong khongdong eh. Ba ka dei ka bit dur bit dar ka iphuh kyntiak bha. Ka mih na iing ha ka por 10 baje mynstep bad ynda la poi ha Motphran ka la leit thied jingbam na R.B. Store, kawei na ki dukan kaba la ju khein standard. Ka thied arjaid ki jingbam kiba bang bha. Ynda ka dep thied ka la phun ia u Hiram u ban sa wanshaw da ka kali lajong ba ka la ap lypa ha Synod Market
“Phi lah ap slem dei?” ong u Hiram ia ka Aitilin ha ka sur kaba jem
“Ym pat da slem eh phi” ka jubab bad ka kieng pynbeit ia ka bek rong brown
“Te, ngin leh kumno ngin ia rung dihsha shwa ne ngin leit noh beit beit sha iing?” twad jingmut u Hiram
“Katba phi sngewbit ma phi u nongialam” ka ong bad ka wiat samrkhie
“To ia ngin iadih tang ka plain soup ne katba phi kwah” u ong
“Tang da ka sha lah biang phi bad u Raskula ban um shyntur shibit da ia kren” biria ka Aitilin bad iaid ban leit sha dairy
U Hiram u la poi ha iing ha ryngkat bad ka Aitilin ha ka por 2 duna shipowa. Tang shu rung ha baranda la khublei pdiang sngewbha da u kpa bad ka kmie. La pynrung ha kamra shongkai kaba itynnad bad kaba iphuh bha da ki pyrda remdor bad ki jingbuh jingsat kaba pynphuh ia ka kamra hi baroh kawei
“Kumno phi iakhlain ha iing?” la kylli u kpa u Hiram
“Hooid, ngi iakhlain” ka jubab da ka sur kaba jem
“Nangta phi iatrei iaktah aiu?” la kylli biang u kpa u Hiram
“Nga te nga shim pynkhreh kot khynnah ha iing?” ka jubab
“Ka mut phim pat trei pura mo?” u ong bad shong tawah kjat
“Ia mynta te em. Sa ia peit ia kaba lashai lashi sngi” ka ong bad niat ia la ka shyntur
“To kam lei lei yn sa ioh kam hi hadien” kynrup ktien noh ka kmie u Hiram
“Phi lah dep degree ne kumno?” bniah ka kmie u Hiram
“Nga dang pule second year tangba nga la bakla samla noh” ka jubab lehrain
“Sngew bynnud shi rukom tangba yn leh shuh kumno haba la kum bakla noh kumta” ong ka kmie u Hiram [yn dang bteng]