Ha kajuh ka por; leit thep kyrteng ki kyrtong ka NPP na bynta 5 ki Konstitwensi ha Ri Bhoi

Nongpoh: Shisngi hadien ba 4 ngut ki kyrtong ka Congress ki la leit ban thep kyrteng ha ki Returmning Officers kiba don ha ophis u Deputy Commissioner ka Ri Bhoi, sa mynta ka sngi ki san ngut ki kyrtong ka NPP ha Ri Bhoi, kiba la mih ban iakhun na ki san tylli ki konstitwensi ha Ri Bhoi, ki la leit ban thep kyrtong bad ba kin long kum kita ki kyrtong bad kiba ban sa aireng ha ki konstitwensi kiba don ha Ri Bhoi.

Lyngba jong katei ka sngi, ba kitei ki kyrtong ka NPP ha Ri Bhoi ki la leit ban thep kyrteng, la iohi ba ki la don ha ryngkat bad shibun ki nongkyrshan jong katei ka Party, kiba la bud haduh ka phyllaw jong ka ophis treikam u DC ka Ri Bhoi. Ka kyrteng jong kitei ki kyrtong ka NPP bad kiba la wan ban thep kyrteng mynta ka sngi, ki kynthup ia u Bah Sosthenes Sohtun, kyrtong na Jirang, u Bah Shemphang Lyngdoh, Kyrtong na Mawhati, u Damanbaitbha Lamare, kyrtong na Umroi, u Bah Jason S. Mawlong na Umsning bad ka Kong Macdalyne S. Mawlong na Nongpoh Constituency. Khyndiat haba phai halor ka jingwan thep kyrteng ki kyrtong na ki Party, kat haduh mynta ka la poi sha ka 12 ngut, kata 5 ngut na ka Congress, 5 na ka NPP, 1 na ka HSPDP bad 1 na ka PDF.