Bret u MM Danggo ia ka tiket NPP, un aireng na ka BJP

Shillong:U Martin M Danggo uba long u MLA barim jong ka Ranikor konstitwensi ha ka sngi Balang ka 1 tarik Rymphang ula leit pyniasoh noh ialade sha ka parti BJP hadien ba kiba bun na ki nongkyrshan ki jong u ki la dep ban pyniasoh bad katei ka parti ha ka 30 tarik Kyllalyngkot 2023.

Ka jingrung jong u Danggo sha ka parti BJP ka dei ha dien ba ki nongkyr shan ki la dawa ba u dei ban iehnoh ia ka parti NPP bad phah pat ia u ba un leit iakhun noh na ka parti BJP ha ka elekshon ban long haka 27 tarik Rymphang.
Ha ka 30 tarik Kyllalyngkot da ki spah ngut ki nong kyrshan ba radbah bha jong u Danggo ki la pynlong ia ka jingialang ha Shillong Club bad ki la shim ruh ia ka rai ban phah iakhun noh ia u Danggo na ka parti BJP bad ha kajuh ka sngi ki nongkyrshan ki jong u ba iadon da ki spah ngut ki la rung sha ka parti BJP. Kumta na ka liang jong u Martin M Danggo ula bud lem ia ki nongkyrshan ban rung noh syndon sha ka parti BJP bad ban long ruh ha kajuh ka por kum u kyrtong jong ka parti na Ranikor konstitwensi.

Kum ban shu pynkynmaw ba u Martin M Danggo u dei uwei na ki 58 ngut ki kyrtong kiba ka parti NPP ka la pynbna ha ka jingialang pynbna kyrtong jong ka ha Polo ha ka 12 tarik Kyllalyngkot 2023, hynrei tang hadien artaiew ba u Danggo ula dei u kyrtong jong ka NPP ula rai ban iehnoh ia ka parti ba la ai tiket ia u bad rung noh sha ka BJP namar ba ki paidbah kim kwah ba un iakhun na ka parti NPP.

Haba ai jingkren ha katei ka sngi, u lamphang barim jong ka ïingdorbar thawaiñ jong ka jylla ula iathuh ba ka rai ban rung sha ka parti BJP kam dei satia ka rai shimet ka jong u, hynrei ka dei ka rai jong ki paidbah namar ba ha ka 30 tarik Kyllalyngkot ki paidbah ki la rai ban iehnoh lut ia ki kam ba ki bat ha ka parti NPP bad ban pyniasoh noh sha ka parti BJP bad na ka liang jong u ruh ula shim lang ia ka rai ban rung sha ka parti BJP ha ryngkat bad ki paidbah nongkyrshan ki jong u kiba la dep rung kham hashwa.

Hadien ba ula rung sha ka parti BJP ula pan ruh ka jingkyrshan ba pura na ki nongialam jong ka parti BJP ba kin ialam lynti watla ha ki por kiba lyngkot hynrei kin iatreilang na bynta ka lawei ba bha jong ka konstitwensi hi baroh kawei.