Ka bor U Himanta, ha ka politiks ka jylla

Kiwei ki lah ban bein ban khoh, hynrei, ka eh than, ban jynrat ia u diengbah jong U Himanta Biswa Sarma, Chairman ka North East Democratic Alliance (NEDA) bad myntri rangbah jong ka Assam.Une u rangbah, ula shu khyrwait, kumba khyrwait jain, ia ki nongialam sain pyrthei jong ka Meghalaya.

Ngin nym ia kynmaw jngai eh, hynrei ngi tip shai, ba U Conrad Sangma, u bym dei tang U MLA, u iohi shuki myntri rangbah, dei lyngba U Himanta ha u snem 2018 bad katei kam dei ka jingkren jongno jongno, hynrei U Himanta, ula phla hi ha ki kotkhubor, ba katei ka dei ka kam, kaba ki la iadep rai lypa, ha ki lai bnai, ha shwa ka elekshon 2018.
Halor u pud u sam, la iohi, ba U Conrad Sangma, u hap leit hajir khah khah sha Dispur, ban pan jingbit na U Himanta bad hadien kata, ki sa sdang ka jing ia pynbeit pud ki arliang mamla bad katei ka jing ia pynbeit pud, ka ai ia ka Assam, haduh 19 square kilometre.

Kam kut tang katta, ka wan sa ka jingshah siat ki Khasi ha Mukroh bad ka dei ka jingjia, kaba da paw bieit hi khait, ba kat katei ka jingjia, U Himanta, u long pynban u angel, ha kaba U Conrad Sangma, u ia hiar lang sha Delhi bad U Sarma, ban leit dawa tohkit CBI, halor katei ka jingjia bad haduh mynta, ym shym la kem satia, wat tang ia uwei uba siat ia kitei ki 5ngut ha Mukroh.
Katei ka la iaid bad mynta, utei u juh u briew, ula dung ngak, nadien, ia u paralok la jong, da kaba u shim noh ia u briew, uba la dep pynbna tiket, U Martin Danggo, da kaba pyn iasoh ia utei u nongialam sha ka seng BJP bad kane ka la kylla long ka jingjia, kaba pynjem rngiew shibun ia ka seng NPP, namar ba (i) ka leit ai tiket ia u bym kwah bad (ii) ba ka shah shet ha u kandidet, uba ki dang shu dep pynbna, dang ar, lai taiew tam mynshwa.

U nongthoh khubor ka India Today, ula dep kylli ia U Conrad Sangma, ha ki khyndiat bnai ba ladep “Balei ba u ju pyndem ngon ialade ha ka mon jong U Narendra Modi bad U Himanta Biswa Sarma” bad ia katei ka drama, kaba dang jrong, ngin sa nang ia peit ha ki sngi, ki ban sa wan bad khamtam, ha ka sngi niew vote jong ka 2tarik Lber 2023 bad hangtei ka dur ka dar jong U Himanta, kan sa paw tyngkren ha ka sain pyrthei jong ka jylla.