“U Bah Pynshai, ha ka por ka NCP u rem, U bah Hamlet, ha ka por NPP un rem”

Shillong:Ki ar ngut ki kyrtong jong ka National people party (NPP) kiba dei ruh ki shipara trai, ka kong M Ampareen Lyngdoh, ka ban iakhun na East Shillong konstitwensi bad ka kong Jasmine Lyngdoh, ka ban ia khun na Nongthym mai konstitwensi, ki la dep ban thep kyrteng ialade na bynta ka elekshon ka ban long ha ka 27 tarik Rymphang 2023, ha ka kamra treikam jong u Returning officer jong ka East Shillong Constituency bad ka Nongthymmai constituency kaba don ha DC ophis Shillong.

Kine ki longkmie ar ngut ki ban ia khun ia ka elekshon ka ban wan ki la pynpaw shai ba ki don ka jingngeit kaba skhem ba ki paidbah jong ki artylli ki konstitwensi kin phai khmat sha ki bad sha ka parti NPP.
Haba iakren bad kine ki ar ngut, hadien ba ki la mih na ka ophis jong u Returning officer, ka kong M.Ampareen Lyngdoh ka la iathuh ba ka jing wan jong ki ban thep kyrteng nyngkong kam dei satia ha ka sien kaba nyngkong, hynrei ha manla ki elekshon naduh ki por u kpa u jong ki, u badei ruh u MLA barim jong katei ka konstitwensi, u hynmen u jong i ruh bad haduh kane ka kynti kaba mynta ruh kumjuh.

Haba iadei pat bad ka jing sngew thikna ba haduh katno ba ka sngewskhem ban wan phai biang kum ka MLA jong ka East Shillong constituency,ka kong Ampareen ka la iathuh ba ha kaba nyngkong hi ka don jing syier ban kynriah sha kawei pat ka parti, hynrei hadien jong ka jing shimrai lang ha ryngkat ki paidbah nongkyrshan, namar ba ki nongkyrshan hi ki la iathuh ba ka jing rung jingmih ka jong ka na kawei ka parti sha kawei pat kan ym ktah satia, ha kaba ka la kam ruh ba hadien jong ka jing pyniasoh jong ka sha ka parti NPP, ka jing ai jing kyrshan jong ki paidbah ka la nang skhem shuh-shuh.

Haba iadei pat bad ka jing don mukotduma ka jong ka, ka la iathuh ba kan ym ktah satia ia ka, ha kane ka elekshon namar ba ki paidbah jong ka konstitwensi kaba kan iakhun ki la ioh jingshai lut, la iathuh ka MLA barim ka East Shillong constituency.
Haba ia kren pat bad ka kong Jasmine Lyngdoh, ka ban iakhun na Nongthymmai constituency, ka la iathu ba na ka liang ka jong ka, hi ka la dep ai 100 persen sha ki paidbah bad ka shong pat ha ki paidbah nong shong shnong jong ka konstitwensi ba kin ai ka 100 persen ka jong ki, ha kaba ka la ong ruh ka thong ba nyngkong hi ka long beit ban peit ia ka jingdonkam ha ka constituency hi baroh kawei, lada ka dei kino kino ki bynta ruh ha kaba ka la ñiew ruh ia ki khun samla kum ka spah bah jong ka jylla, ban btin bad ialam lynti ia ki na bynta ka lawei ka jong ki da kaba wanrah ia ki jaka pule, jaka ai jinghikai pyntbit bad kiwei kiwei pat kiba don kam.

Ha kane kajuh ka sngi u kyrtong shimet u ban ia khun na Mylliem constituency, u bah Pynshai Manik Syiem u la wan ban thep kyrteng lang ha katei ka sngi da ka jing wan synran lang ka khun jong u, ka kong Telinia Thangkhiew bad ki nongkyrshan.
Haba ai jingkren hadien ba la mih na ophis treikam jong u Returning officer jong ka Mylliem constituency u bah Pynshai Manik Syiem, u la iathuh ba kaba nyngkong hi ka thong ka jong u ka long beit ban wanrah ia ka roi ka par ia ka konstitwensi katkum ka jing iaid jong ka por ha kane ka spah snem ba 21 bad na bynta ka jylla pat kaba donkam mynta ka long ban pynthymmai ia ki aiñ kiba la rim ba kin long biang ki aiñ kiba khlaiñ, khnang ba kin lah ban iada ia ka lawei jong ka jaitbynriew.

Haba iathuh pat ia ka jing iakhun ka jong u kum u kyrtong shimet ha kane ka elekshon ba mynta, u la iathuh ba ka dei ba u kwah ban long u ba laitluid ban kren, namar ki kyrtong shimet ki don ia ka hok ban long kiba laitluid, khamtam ia ki mat kiba ktah ia ka jaitbynriew, la iathuh u bah Pynshai.
Haba iathuh ia ka jing skhem jingmut ban jop ia kane ka elekshon, ka long beit na kiba bun bah ki kam ki ba u la trei ha ki snem kiba la leit noh, ha kaba u la long u MLA jong ka Mylliem constituency la lai sien kynthih, hynrei da ia nujor bad ka roi ka par ha kine ki sngi um ihun satia, wat la ka MLA skhim ka long da ki klur tyngka, katba ki kam pynroi ki dei beit tang ha shwa jong ka elekshon, la ong u bah Syiem.

U bah Pynshai Manik Syiem, u la kam ruh ba u la rem ia ka elekshon ha ki por ba u Purno A Sangma u dei u Myntri Rangbah jong ka jylla, katba u Bah Hamlet Dohling un rem ia ka elekshon ha ka por ba u khun jong u Purno A Sangma, u Conrad Kongkal Sangma, u dei u Myntri Rangbah jong ka jylla, namar ba ha ka por ba u bah Pynshai Manik Syiem u iakhun na ka NCP ha ka jingialam jong u Purno u la rem bad mynta ka kynti pat u Hamlet Dohling, un iakhun na ka NPP ka ba ialam da u Conrad Kongkal Sangma, ki juh ki jingjia kin wan jia u la kam.