Ka FOCUS, ka dei ka skhim ai ram ne ka skhim ai ei?

Ka la mih shibun ka jing iakren, halor kane ka skhim FOCUS, ha kaba U bah AL Hek, ha ki khyndiat sngi ba ladep, ula kren ha kawei ka video channel, ba ka skhim FOCUS, ka dei ka ram, kaba la shim da ka sorkar jylla na ka World Bank bad kam dei tang katta, wat u nongialam jong ka seng BJP, U bah Ernest Mawrie, ula kynthoh kham mynshwa, ha kaba u ong ba katei ka dei ka ram.

U Conrad Sangma, myntri rangbah ka jylla, pat u kyntait, ba katei kam dei satia ka ram, hynrei ka dei beit ka skhim ai ei bad u iathuh ba kin don kumba 4.5 lak ngut ki nongrep, ki ban ioh T.5hajar shi khlieh bad katei kan poi sha ka T.500klur ha ka shisnem ka jinglut pisa.

Na kitei ki jingkren haneng, ngi sngewthuh shai, namarkata, ba ka pisa, kam dei kaba wan, na ka skhim jong ka sorkar India; hynrei ka dei ka ram, kaba la shim na World Bank, tangba la sngewthuh ruh, ba katei ka ram kaba T.5hajar shi khlieh, ym dei satia, ban siew, da uto uba ioh ia katei ka skhim, hynrei, kin hap ban siew ki paidbah jong ka jylla, lyngba ki khajna, ba ka sorkar, kan sa buh dor, ha ki rukom bapher.

Katei ka jingkren kam pat biang satia tang katta, namar ba lada ka wan biang ka NPP, ban thaw sorkar, kumta kan lah ban pyniaid ha katei kajuh ka dur, ia katei ka skhim; katba lada kan wan, da kawei pat ka sorkar, ka lah ban thet kti ialade (namar ba ka tip shai, ba katei ka pisa, ka leit sha ki nongkyrshan NPP) bad kumta kan pynkylla ia ki kyndon bad kan bret ia ka jingkit sha kito kiba la ioh ia katei ka pisa bad kumta, kan buh ia ka jingeh kaba khraw ia kito kiba la tare ia katei ka skhim bad kiba shim, ba ka dei ka pisa ioh ei na ka sorkar.

Kaba kane ka sorkar NPP, ka leh bakla than, ka long ruh, ba katei ka skhim, ka kylla long pynban, ka skhim ai ei pisa, wat ia ki nongbylla kiba shong ha sor, haba ka jingthmu jongka, ka long ban iarap tang ia ki nongrep, kiba don ia ki bri ki lyngkha; katba ha kine ki sngi, na ka bynta ban wad vote, la iohi, ba kiba shong ba sah ha sor, ki bym tynrai dieng, tynrai diengsoh, lane ki bym don wat, ia shi tda ka lyngkhot khyndew, hynrei ki ioh lem ia katei ka bhah bad katei ka kylla long pynban, ka skhim kamai vote jong ka NPP.