Shongkun ka jingiakynduh ba shisien shi snem ki jaidbynriew Karbi ha shnong Sohliya

Nongpoh: Ha ka jingiakynduh kaba shisien shisnem jong ki briew na ka Jaidbynriew Karbi bad kiba don ha ka kynhun jong ka All Meghalaya Karbi Association (AMKA) bad kaba la tip kum ka 48th Annual Conference kaba ki la pynlong ha Sohliya, ka la long kaba shongkun, ha kaba bun na ki Karbi ki la leit ban shimbynta ha katei ka jingiakynduh hapdeng ki Karbi.

Lyngba jong katei ka jingiakynduhlang kaba shisien shisnem hapdeng ki Karbi, la sakhi da ka jingdon u Syrya Rongphar, EM ka KAAC bad uba long kum u Kongsan, nangta u Samson Teron, President ka Karbi Student Association, u B.S Teron, uba dei u nongseng ia ka AMKA lem bad shibun bah ki paid Karbi na ki thain bapher bapher jong ka jylla.

Haba iadei bad katei ka jingiakynduh kaba shisien shisnem, kitei ki nongialam ka AMKA, ki ong ba ka jingthmu jong katei ka jingkynduh lang ba shisien shisnem jong ki jaitbynriew Karbi, ka long ba ki paid Karbi haka jylla kin don ka jingiadei kaba jan, ka jingiaieid bad ka jingiatylli para jaitbynriew la ki don sha kano kano ka jaka wat shabar jylla, ban pynim bad pynneh pynsah ruh ia ki riti bad ki dustur tynrai ba la buh naduh mynbarim ba kum ka jaitbynriew Karbi kim dei ban klet.