Ka iktiar ki Rangbah Shnong, ha ka elekshon

Ka burom, ka dei ban leit sha ki ar tylli ki dorbar shnong jong ka sor Jowai, kiba kynthup ia ka Loompyrdi Iongpiah bad ka Panaliar bad katei ka long, namar ba kitei ki dorbar shnong, ki pyni shisha, ia la ka jong ka iktiar, ha kane ka elekshon MLA 2023 bad kata ka long, ba ki teh kyndon, ia ka tah dur tah dar ha ki kynroh jong ka shnong, ki teh kyndon, halor ki jingrwai jingtem bad kaba kham kongsan, ka long ba kim shah palat ia 10ngut ki nong kyrshan, ba kin leit synran ia u kyrtong, haba u leit kanbas, ha kitei ki ar tylli shnong.

Ka elekshon komishon, ka la dei ban ai ia ka khusnam, kaba heh tam, sha kitei ki ar tylli ki dorbar shnong, namar ba ki ieng halor ka nongrim, ban pynneh ia ka synshar khadar kaba khuid bad ban teh lakam ia ka jing pynlut pisa maphot, da ki kyrtong heh spah bad ban pynbieit ia ki nongthep vote.

Kaba donkam kyrkieh ia mynta, ka long ba kitei ki ar tylli ki dorbar shnong, kin lum noh ia kiwei ruh ki dorbar shnong ha ka sor Jowai bad ba kin teh da kitei ki juh ki kyndon, sha baroh ki seng sain pyrthei bad ki kyrtong bad lada ka long kumta, ka pyni, ba wat u nongbylla sngi ruh, un nym salia shuh ban ialeh elekshon.

Kam dei tang katta, hynrei, ka wan shuh ka mat, la ki don ne em kiwei pat ki dorbar shnong lane ki dorbar Raid ne ki dorbar Hima, kiba nud ban teh kyndon ia ki kyrtong elekshon MLA 2023 bad lada ki don, ki la dei ban pyni noh ia la ka jong ka iktiar; hynrei ka jingeh, ka long ba ha kine ki sngi, ki don bun ki Sirdar, ki Rangbah Shnong, ki Syiem, kiba shu leit bud tdong, kat sha ka liang jong ki MLA/MDC kiba jop bad katei ka long ban leit jliah khohwah bad ban leit tong mithai bad ban pyn donkam bakla, ia la ka jong ka muhor ban shna pisa ialade hi.

Katei ka rai jong ka dorbar shnong Panaliar, ka khang pyrshah ruh, ia ka iaid miet iaid iong bad ka jing iasam pisa sha ki nongthep vote bad haba ka long kumta, ka pyni shai, ba ki briew kiba nabar shnong, kim bit ban ia rung ia mih sha kitei ki ar tylli ki shnong ha ka miet ka iong bad ban leit theh tyngka, ban kamai vote.
Ka politiks, ka la jot thiaw, ha ka jingpynjot ki heh spah bad ka don tang katei kawei ka lad, kaba i don jingkyrmen bad kata ka long, haba don ki bor shnong, kiba pyni hok, ia la ka jong ka iktiar.