Pyndep ka Raid Marwet ia ka knia ka khriam jong ka Lehniam Sohjer

Nongpoh:Ka Raid Marwet lyngba ka Marwet Sohjer Committee, mynhynnin ka sngi ki la pyndep noh ia ka Lehniam Sohjer ne ka rukom Lehniam leh rukom bad ka Knia ka Khriam ba saw sngi kaba ki la pynlong ha ma dan ialehkai ka shnong Baridua.

Lah ruh ban kdew hangne, ba ia katei ka Lehniam Sohjer, la plie ha ka 17 tarik mynta u bnai, hynrei mynhynnin ka sngi la pyndep da u Paiem Ken Syiem, Syiem ka Raid Marwet, ha ryngkat ka jingdon ki Basan, ki Myntri, ki longsan mansan ka Raid, ki riew rangbah ka thaiñ lem bad ki khun ki hajar jong ka Raid Marwet.

U Paiem Ken Syiem, u la ong ba katei ka jinglehniam ka dei kaba ju leh shisien shisnem da ki khun ki hajar jong ka Raid Marwet ban ainguh aidem ïa u Blei nongbuh nongthaw, ba un kyrkhu kyrdoh ïa ki khun ki hajar baroh shisnem khamtam hadien ka jingioh kheit ïa u soh ba nyngkong jong ka jingtrei shitom jong ki baroh shisnem bad ruh ban pynim ïa ka kolshor tynrai, kaba la don naduh ki por mynshwa.