Ka NPP kan hap husiar ïoh shah klun lut ha ka BJP, ong ka Congress

Shillong:Ki nongïalam jong ka party Congress, ka Bobeeta Sharma bad u Mathew Anthony kiba dei ki National Media Coordinator jong ka party kila pynsyier ïa ka party NPP ba ka hap ban husiar ïoh ka shah klun ha ka party BJP.

Haba kren ha ki lad pathai khubor mynta ka sngi ha Congress Bhavan, u Mathew la ong ba la ïohi na kaei kaba la dep ban jia ha ka jingïadei ka BJP bad ha Shiv Sena ha Maharashtra bad kaei kaba la jia ha Tamilnadu, u Nitish Kumar Myntri Rangbah ka jylla Bihar u la sngewthuh u sa ïakhlad noh bad ka BJP.

Ka Bobeeta Sharman ka la kdew ba u State President jong ka BJP u Bah Ernest Mawrie u la kynnoh ba kane ka sorkar MDA kaba la ïalam da ka NPP ka dei kaba bamsap, hynrei ka BJP ka khlem weng ïalade na ka jingïatreilang bad ka sorkar, kane dei ka dak ba lada ka NPP kam husiar kan shah klun.

Haba phai sha ki seng riewlum ka Bobeeta kala ong ba donkam ïa ki seng riewlum ba kin long kiba khlaiñ, ka party Congress ka la juh leh ïa kane ban pynkhlaiñ khlem da ktah ïa ki katba ka BJP ka ïaleh ban khanglad ïa ki seng riewlum ban dangkiew.

Na ka liang jong ka party Congress shen kan sa pynlait paidbah ïa ki kyrteng jong ki kyrtong bad khmih lynti ba ka congress kan jop bun bha ha kane ka kynti kaba mynta namar ka congress ka la juh sei ïa ki samla ban long ki nongïalam bad mynta ka kynti ruh ka party congress kan sei ïa ki nongïalam ha kane ka jylla.