Mih u Bishop ba thok, ban pynkyntang Lyngdoh ha Langñiuh

Shillong:Ka Bishop House, New Nongstoiñ, West Khasi Hills ka la kyntait ban ai jingithuh ïa ka “Jingpynkyntang Lyngdoh” ha ka shnong Langñiuh, Eastern West Khasi Hills, haba pynpaw ba uto uba phrung dur kum u Bishop ba pynkyntang, um dei satia u Bishop jong ka Balang Catholic.

Katkum ka kyrwoh na u Rev Fr Anselm Nonglang, Diocesan Administrator ka Nongstoiñ Diocese la pyntip ba ki don ki riew shim kabu kiba kam ïalade kum ki Bishop bad kila leit ban pynkyntang Lyngdoh ha kane ka Shnong. Ula pyntip ba ka Balang Katholik kam don jingtip eiei halor kane ka jingpynkyntang.

“Ka Long kaba sngewsih ban tip ba ha kine ki sngi, ka la don ki dak jong ka “jingïaleh pyrshah ïa ka Jingngeit Katholik” da ki katto katne ki Khun Khristan Katholik ha kane ka Jylla Niam Nongstoiñ. Ka Jylla Niam Nongstoiñ ka pynrem jur halor kine ki jingjia ba shyrkhei ban pyrshah jingngeit Katholik; khamtam da kito kiba shu leh mynleh bad kiba kam ïalade ba ki dei ki Bishop bad kiba la shim kabu ban pynkyntang Lyngdoh, kumba leh ha ka Balang Katholik jong ngi,” ong ka kyrwoh.

“Ka Balang Katholik Nongstoiñ kam don jingtip eiei shaphang ka “Jingpynkyntang Lyngdoh” hapoh ka Shnong Langñiuh (hajan Mawtikhar bad Rikhen). Uto uba pyrshang leh bad phrung dur kum u Bishop, um dei u Bishop jong ka Balang Katholik,” ula bynrap.
Katkum ka jingong jong u, katei ka jingjia ka dei ka jingïaleh pyrshah ïa ka Balang Katholik haba bynrap “Ka Aiñ jong ka Balang Katholik Canon Law, Can 751, ka batai shai, ba ngi ïaleh pyrshah ïa ka Jingngeit ha ki lai rukom.”

a. Herese : Ka dei ka jingkyntait khang lane ka jingartatien khang ïa ka jingshisha ba ngi dei ban ngeit.
b. Apostacy : Ka dei ka jingiehnoh pura ïa ka jingngeit Khristan.
c. Schism: Ka jingkyntait ban snoh ha ka bor pynïaid jong u Kpa Bakhuid lane ka jingïalong kawei ki paid “Riewngeit kiba shah synshar ha u.
U Rev Fr Anselm Nonglang ula kyntu ïa ki para ba ngeit ba kin long kiba husiar ïa ki “Nongïalam Bakla” khamtam kito wan “Kum ki Suri Kup Snieh Langbrot”.
Caption: U Bishop ba shukam uba dang pynkyntang Lyngdoh.