“Kaba shyrkhei mynta dei ka reservation, ban pynduh reservation, ki leit da ka roster” ong uwei na ki shipai ialeh hill state

Shillong:”Kaba shyrkhei eh mynta, dei ka reservation bad ban pynduh ia ka reserva tion, ki leit da ka roster. Phi tip ki claim naduh 1972, ban ioh ia ka 40 percent jongki” ong U Bah AS Mawlong, uwei na ki shipai ban ialeh jylla Rilum.

“Ha kata ka por, ia U Garo, uba pass BA, dang lah ban niew, te yn ai kam kumno” ong shuh shuh U bah Mawlong bad halor katei ka mat, U bah Mawlong, ula ai jingmut, ban ujor ia katei ka mat sha Supreme Court syndon ban ialeh pyrshah ia katei ka rai bad u ong “Balei ban claim ia kaba ladep”.
“Ki khynnah jongngi, kim ioh kam, te kumno kin ioh kam, namar ynda retire ki Khasi, sa thung da uto” ong shuh shuh utei u rangbah.

U Bah Apul Mawlong, u ong shuh shuh, ba mynta ia ka khlein, ka khi, ka makhon shatai la rah lut sha Garo bad, u kylli “Shaei ka leit ka University, kane ka dei ka headquarter”. Haba kren ia ka jinglong jong ki jaitbynriew ha ka jylla Meghalaya, ula ong “Uno uno, u bym dei u khasi, u dei u dkhar” bad nangta u ong biang “Mynta u synshar u dkhar”.

U bah Mawlong, u iathuh shuh shuh, ba ha ka por jong ka jingialeh hill state, ki paidbah, ki ia synniang pisa ban ia dih sha saw ha Riatsamthiah, ha ka jingialam jong U Bah Bremly Lyngdoh.
Kiwei pat ki shipai jylla rilum, kiba kren, ki kynthup ruh ia U Bah Sharaid Nongbri, bah Prowell Marwein bad U bah Roscan R Lyngdoh. La leh burom ruh ia ki 45 ngut ki nongialeh hill state na kylleng ka Ri Khasi Jaintia, ha katei ka sngi.