Wat hapdeng bun kiba kynthoh bad kawang ktieh, kyrmen u Conrad ban synshar marwei ka NPP hadien Ilekshon

Nongpoh: U Conrad K. Sangma, Myntri Rangbah ka sorkar jylla bad uba dei ruh u President rangbah ka National People’s Party (NPP), haba kren hakhmat ki paidbah ha Madan Patarim, u la ong ba ka NPP ka don ia ka jingkyrmen kaba khraw eh ba kan synshar marwei, kata wat hadpeng ka jingshah kynnoh bad ki jingshah kawang ktieh kiba laiphewjait ha kiwei pat ki Party kiba don ha ka jylla.

Katei ka jingkren jong u Conrad K. Sangma, ka dei ruh ha ka sngi ba u Bah Jason S. Mawlong, MLA Umsning lem bad u Bah Donkupar Sumer, uba dei u MDC barim ka Umsning, ki la pyniasoh noh ialade sha ka NPP, ia kaba la pdiang sngewbha ia ki da u Dr. WR Kharlukhi, President ka NPP ha ka jylla. Haba kren ha katei ka sngi, u Conrad K. Sangma, u la ong ruh ba katba dangmih ki sngi ki por, ka NPP ha ka jylla ka la nangioh ia ka jingkyrshan na kiba bun, ha kaba wat kiba bun ki nongmihkhmat na ki Konstitwensi bapher bapher, ki la wan ban pyniasoh noh ialade sha ka NPP, kata ka dei hadien ba ki la iohi ia ki kam babha, ia kaba la leh da kane ka sorkar MDA bad kaba la lamkhmat da ka NPP.

Ha kine ki sngi ban wan, kin sa don shibun ki nongmihkhmat na kiwei ki Konstitwensi, ki ban sa wan pyniasoh ialade sha ka NPP bad lyngba kata, kan pynkyrmen eh ia ka NPP ba kan ioh ban synshar marwei ha kane ka ilekshon 2023, watla ka mad ia shibun ki jingshah kynthoh ha kiwei ki kyrtong jong kiwei ki Party, u la bynrap.