Ka jingkyrduh pisa khutia tasam

Ngi la iaid sha u snem thymmai, hynrei ngi syier jingmut, ba ka ioh ka kot, ka kamai kajih jongngi, ka lah ban nang hiar arsut ha une u snem ruh.

Kito kiba trei kam khaii, kiba trei kam lajong, ki kmie ki kpa, ki shem shitom shibun ban kyrshan ia la ka iing ka sem, na ka jing kiewdor kaba la jubor tasam, ha ki sngi kiba ladep; hynrei kam dei tang katta, ka mih sa kawei ka jingeh bad kata ka long, ka jing kyrduh pisa khutia tasam ha ka jylla hi baroh kawei.

Ngim tip, la kane ka dei ka buit jong ka Reserve Bank of India (RBI) lane ioh lehse, ka dei ka buit jong ka State Bank of India (SBI); kiba dei ki bank heh ha ka jylla, hynrei kane ka jingleh, ka shu pynlut phut ia ka pisa jong u luk u lak, namar ba wei ba la pynpait ia ka kot T.500, kumta ka la shu khuid hi plain na la pla.
Kane ka jinglut, ka pynlutphut shibun ia u duk u suk, namar ba u ioh pisa ruh da ki kot 500 bad u hap leit siew ruh da kato kajuh hi ka dor bad kumta, tang la pharia ka kot heh, ka la khuid kdar na la pla bad kaba sah, ka long sa tang ka bai kali sha iing.

Ka sorkar jylla, ka la dei ban shim khia ia kane ka kam bad kam dei ban ailad ia ki Bank, ba kin buhrieh pisa ha kane ka dur bad ka dei ban hukum, ba kin pynmih pahuh ia ki pisa khutia, lada dei ki kot 200, ki kot 100, ki kot 50 bad sa kiwei ki pisa kiba rit dor bad katei kan hikai ia u briew, ba un kynshew kyndiap bad kam dei tang katta, ba un nang ruh ban ia khlieh dor, haba thied jingthied ha iew ha hat, da kaba u pynbiang ia ka pisa khutia ha la pla.

Ki don bun kiba sngewthuh ba kawei na ki daw jong ka jing kiewdor ki mar ki mata ha kine ki sngi, ka dei ba ngim ju long ki briew kiba nang ban ia dait dor bad ba ngi ju mlien ban pynkylla sha ki phew ne sha ki spah, haba ia thied jingthied bad katei ka ailad ia u nongdie dukan, ia u nongniah taksi, ba un nym pynmih khutia, hynrei un khlieh dor beit, ha ka dor kaba kot sha ki phew ne sha ki spah.
Mynta lei ba ka elekshon, ka la nang hajan eh, kan jin da la bha, lada ki Bank, kin ia sam pahuh ia ki pisa khutia ha iew ha hat bad katei kan iarap ia ki kyrtong ba kin kham pynlut duna ialade, da kaba kin sei ia ki kot 50, ki kot 100, ki kot 200 ban pynjem mynsiem ia ki nongdih kiba dawa pisa sha ki jaka ba ki iaid kanbas.