Shongsyier biang ka India, na ka khlam covid

Ka China, ka don ha ka jingshah lynshop, kaba jubor, ha ka khlam corona bad la iathuh, da ki lad khubor, ba ki met iap, ki la shu syrtap ha ki hospital bapher jong katei ka Ri; hynrei ka jing shisha, kam shym la paw pyrthei satia, namar ba katei ka Ri, ka buhrieh khop ia ka jinglong jingman jong katei ka jingpang bad ba ka set slung ia kito kiba don ia ka jingpang, la kumba set phatok ia ki riew runar.

Katei kam da dei eh, ka mat, kaba ngin ia tai bniah hangne, hynrei, ka mat, kaba kongsan bha hangne, ka long, ia ka jinglong ba la pynkhreh jong ka sorkar Jylla lem bad ka sorkar India, ha ka jingiakhun ia kane ka khlam, kaba triem tam ha ka pyrthei bad kam dei tang kumta, hynrei ki don ar tylli ki phang, kiba donkam eh bad kitei ki long (i) ban iada na katei ka jingpang bad (ii) ban nym khang ia ka kamai kajih jong ki paidbah.

Lyngba ki jingjia, ha ki ar snem ba ladep, ngi iohi, ba ki phew lak ngut, ki la ioh ia katei ka jingpang bad nangta, sa ki lak ngut kiba iap bad ki don shibun bah, kiba duh ka kamai kajih, kiba hiar ka ioh ka kot, ka jingkiew ki dor ki mur bad katei ka jingim sohsat, ka dang iai bteng haduh ha kine ki sngi, ha u paidlang ba bun bah jong ka jylla bad ka Ri hi baroh kawei.

Ym tang katta, ngi iohi shai, ba ka sorkar India lane ka sorkar jylla, kim don lynti ban iarap ia kito ki shem lanot jong katei ka khlam corona bad kaba da i jaboh hi khait, ka long ba ha ka sorkar Meghalaya lei, ba ka leit sam da ki katto katne tylli ki khun sniang bad ki khun syiar, nangta ban sam T.5 hajar shi khlieh briew, ban iarap ia ki shem lanot jong ka khlam corona bad katei ka dei ka kam niewbein, kaba palat liam bad kaba ki riew paidbah, kim dei satia ban shim, ia kitei ki skhim khiew jakai bad ki dei ban khalah sha nala.

Lyngba ka jinglynshop jong ka khlam ha China; kumta, ka la dei ia ka sorkar India, ba kan pyrman bha ia ka jinglong jingman ha ki jylla bapher bad ban peit, ba ka jingiada na ka jing lynshop jong ka khlam, ka dei ban wan ha khmat duh bad nangta, ba kam dei ban don ka jing khanglad khang lynti, ia ka kamih kajih jong u duk u raitoi bad ha kajuh ka por, kam dei pat ban ailad, ban sam paidbah, da ki skhim tad dor lane ki skhim pynjem daw briew; hynrei, ba dei ban thaw ia ki lad kiba pynbiang ia ka kamai kajih jong ki paidbah.