Poi ka skhim sam ei sniang, sha tyngkong ka elekshon komishon

Namar ba ki dei ki sngi khatduh jong ka jingsam skhim, kumta, la iohi, ba U Conrad Sangma, myntri rangbah ka jylla, ba u leit tyrwa ia ki skhim khun sniang, skhim T.5 hajar, skhim khun syiar, sha kylleng ka jylla, ha ki bun taiew ba ladep bad kane ka jingleh, ka pyni, ba u paidlang ka jylla, uba don kumba 30lak eiei, ba um donkam shuh da kiwei, hynrei, u shu ia ap rhing, ia ka skhim sam ei, da ki khun sniang, khun syiar.

Hynrei, ha kaba kum kane ka por, ka seng UDP, kaba dei ka kynhun synrop, jong kane ka sorkar MDA, ka la pynher da ka shithi jing ujor sha ka tnat elekshon jong ka sorkar India, ia ka jingsam maphot ia kitei ki skhim, ha kaba ka UDP, ka la ong, ba ka skhim ai ei pisa kaba T.5hajar shi khlieh briew, ka dei ka skhim jong ki nongrep, hynrei, ki nong sor, ki bym ju rep ruh, ki ioh bhah lem ia katei ka skhim.

Kat haduh mynta, ka sorkar jylla, kam shym la pynshai satia, la ka skhim sniang bad skhim syiar, ka dei kaba shu ai ei ne ka dei kaba shu shim ram, namar ba ka seng BJP, kaba dei ka kmie jong kane ka sorkar, ka ju kren, na ka por sha ka por, ba kane ka dei ka ram, ha kaba ki Bank, kin sa wad ia kito kiba ioh ia kitei ki skhim, ba kin hap ban siew ram, wat lada kim siew satia ia ka sut ia mynta.
Kam dei tang kata; kito kiba ioh, kin hap sngewthuh bha, ba ka jingbei pisa ia ki Self Help Group (SHG), ka dei ka ram, namar ba ha kiba bun ki jaka, U Conrad Sangma, u ju pynshai, ba katei ka dei ka jing ai ram ia kitei kito ki kynhun, ba kin lah ban nang pynheh ia ki kam ki duk jongki.

Haba iakren ia kane ka mat, ngi hap ruh ban ia nujor, ba balei ki MLA jong ka seng UDP, kim shym la shim satia ia kine ki skhim, hynrei ki theh buk, da kiwei pat ki jingiarap, la ki dei ki skul, ki hospital bad kiwei ki lad jingiarap, katba kane ka skhim khun sniang, khun syiar, ka iaid tang sha ki MLA jong ka seng NPP.
Ka elekshon komishon, ka la dei namarkata ban tuklar noh mardor, ia kane ka mat, lyngba ka jing ujor jong ka seng UDP, ba kan don ka jingkhuid bad jingsuba jong ka elekshon MLA 2023 bad ba ki paidbah, kim dei ban shah pynbieit ha kine ki skhim tad dor bad ki bym pyn myntoi satia iano iano, lait tang ka kam pynbiej, ban ioh kamai vote.