Pynrem jingiakhih ki Garo, kyntu ban weng noh ia ka jingdawa

Nongpoh:Ka Synjuk ki Rangbah Shnong Ri Bhoi District (SRS RBD), ka la pynrem jur eh halor ka jingiakhih ki paid na ka Jaid bynriew Garo, kiba don hapoh ka shatri jong ka All Ri Bhoi Garo Headman Association bad kiba la dawa na ka Hima Myl liem bad KHADC, ba ki dei ban weng noh halor ka hukum kaba ki la phah sha ka ophis u Deputy Commissioner ka Ri Bhoi, ha kaba katkum katei ka jingthoh ka btah ia u DC, ba um dei ban pdiang ia ki No Objection Certificate (NOC) ne ki Dulir jaka, na kito kiba kam rangbah shnong kiba dei ki Garo.

Haba kren sha ki lad pathaikhubor, u Bah PB Sylliang, Secretary ka SRSRBD, u la ong ba ka nongrim kaba la pynlong ia ka synjuk ba kan pynrem ia katei ka jingdawa da kitei ki paid Garo ha Rangsakona, ka dei namar ba katkum ka Myllien Act jong u snem 2007, ka la kren shai ba ki Garo kim lah ban long kum kita ki Rangbah shnong, ne ban ai ia kino kino ki NOC ne ki Dulir jaka, namar ia ki la btah ba ki dei ban long tang kum kita ki nongpeit nongkhmieh, hynrei ban ai ia ki NOC ne ia ki Dulir jaka, lah ban ai tang da uno uno uba dei u rangbah shnong Khasi.

U la ong ruh, ba ha ka jinglap jong katei ka Synjuk, ba kumba ka long mynta, ba ki paralok Garo ki la thombor bad leh Rangbah shnong jubor, ha kaba ki la ai NOC ne Dulir pathar bad dei halor kata ka nongrim kaba la pynlong ruh ba bun na ki jaka jong ka jylla, ki la shah die lut sha Assam.
“Ka Synjuk ka pynrem ruh halor katei ka jingthaw kynhun da kitei ki Garo bad kaba la tip kum ka All Ri Bhoi Garo Headman Association, kumta halor katei ka kynhun na ka liang ka Synjuk ki Rangbah Shnong ha Ri Bhoi kam don jingithuh satia ia ki bad ha kajuh ruh ka por, ki la ki la dawa ba ki dei ban pynduh pyndam noh mardor ia katei ka kynhun, khnang ban lait na kino kino ki jingiasngewthuh bakla.

Kumta, na ka liang ka Synjuk ka kyntu ia ki paid Garo ba ki dei ban don ia ka jingburom kaba markylliang bad ha kajuh ruh ka por, ki la kyntu ia u DC ka Ri Bhoi, ba u dei ban pynskhem ia katei ka jingbtah na ka Hima Mylliem, namar ha ka jingshisha hi ka long ba ki Garo kim lah ban long Rangbah Shnong, hynrei ki dei ban long tang kum kita ki Rangbah Shnong, u la bynrap.