Pynrem ka KJCLF, halor ka jingshah thombor ki Kristan ha Chhattisgarh

Shillong: Ka kynhun jong ki niam kristan ha ka jylla, ha ka shatri jong ka Khasi Jaiñtia Christian Leaders Forum (KJCLF), Shillong ki la pynpaw ia ka jing don lang bad ïeng skhem lang ka jong ki bad kito ki para ba ngeit kristan ha ka jylla Chhattisgarh, ha ka jing mad jing jynjar bad jingtynjuh ka jong ki, kaba la leh da ki riew shim kabu pyrshah ia ki.

Ka kynhun ka la pynrem jur ruh ia kito kiba pyrshang ban wanrah ia kum kitei ki jing thombor ia ki riew shimet bad ki long ïing long sem, kiba dei na ka niam kristan bad ki kynhun jait-bynriew rit paid, da kaba ki shoh bad pynshitom beiñ, ki beh ruh ia ki na ki ïing ki sem bad ki shnong ki thaw ki jong ki. Ka seng, ka ong, ba kaba sngew lyngngoh ka long ba ki briew jong ka aiñ kim shem la treh satia ban pynrung ia ki ha kino kino ki kyndon aiñ pyrshah ia kito kiba leh ia kitei ki kam.

Ka KJCLF ha ryngkat bad kiwei pat ki kynhun niam kristan ha ka ri, ki pynrem jur ia kane ka jing leh shiliang bym iahap para briew shuh bad ka kyrpad ia ki bor sorkar jylla ba kan shim jing kit-khlieh ban pynshitom ia kito ki ba don kti, khnang ban lah ban iada ia ka jing im bad ka hok jong ki nong shong shnong.

Ka jing ia kulmar bad ka jing iashun iwei ia iwei ka dei ban sahngeh noh shi syndon bad ka KJCLF ka khot ia ka jing ngeit bad ka jing shisha ia kito ki nongialam ba kin sangeh noh shi syndon na kum kine ki jing ia shun, ban pyn tikna ba ka niam,ka jing ngeit bad ka riti ka dustur ba shisha kan ai bor ha ka jingim jong ki briew shimet bad ki nong shong shnong.

Ka KJCLF,ka la buh ka jingkyrpad sha ka sorkar pdeng bad jylla ruh kumjuh ba kin pynlong noh da ka jingiakren, hapdeng ki ba bun ki kynhun niam ka ban wanrah ia ka jing ia sngewthuh lang, ka shongsuk shong shngain bad ka jing iatreilang.

Da kaba leh kumne kito kiba don ha ka bor kin tip shai bad sngewthuh shai ba ki lah ban pynduh noh shi syndon ia ka jing tieng jing syier ha ka jingim ba man la ka sngi jong baroh ki nong shong shnong jong kane ka ri ba khraw, la pynkut ka khubor na u Rev Dr EH Kharkongor, Secretary jong ka KJCLF Shillong.