Sangah sa U Modi, ia ki skhim ot ribon, buh maw nongrim

U Narendra Modi, myntri rangbah duh ka Ri, ula wan sha Shillong, ha ka Sngi U Blei, ha kaba kiba bun ki heh ki hain jong kane ka sorkar jylla, ki la ia leit ban shim bynta ha ka jingialang paidbah jongu ha Madan Polo bad ha ka jingialang jong ka North Eastern Council (NEC).

Ha ka jing ialang paidbah ha madan Polo, U Modi, ula ther tyngeh ia ki skhim ot ribon bad ki jingbuh maw nongrim; ha kaba ula ong, ba kitei ki dei ki rukom treikam, kiba la ju leh, ha shwa jong ka sorkar BJP lane ha shwa jong ki snem 2014.

Ngim tip iano ba U Modi, u sangah, namar ba um shym la kren beit sbak ha met, hynrei, kitei ki jingkren, khlem pep, ki la dei ban pynpar niang khriat ia U Conrad Sangma, myntri rangbah ka jylla, uba bunkam ha kine ki sngi, ban leit ot ribon, na bynta ki skhim SHG, ki skhim sam khun sniang, ki skhim sam khun syiar, ki skhim sam pisa T.5 hajar shi khlieh briew bad sa ki skhim plie Civil Sub Division, plie surok bad da ki spah jait, ki jingplie suda bad kiba pyni, ba kane ka sorkar, kam ju trei kam eiei ruh em, ha ki saw snem, hynrei tang shwa elekshon.

Kam dei tang kata, kaba sngewsih, ka long, ba ha ka jingwan jong u myntri rangbah duh, u kren pynban, tang da ka sur jong ka Delhi bad um shym la kren eiei ruh em, ia ka sur jong ka jylla, lane ka jing angnud uba bun balang bad katei ka kynthup ia ka lynti rel, ia ka mobile 4G bad kiwei ki skhim, kiba shongdor T.2,450 klur; hynrei kim shym don satia ki jingiakren halor ka ishu jong u pud u sam, ka jing iadei bad ka ktien Khasi, ka ILP, ka jingshah khang dewiong, ka jing pynkylla ia ka 6th Schedule nalor kiwei pat bad katei ka pyni shai, ba ki nongialam jong ka sorkar jylla, ki lehrain ne ki tieng thot thot, ban kren ia ki mat, kiba kongsan jong ka jaitbynriew.

Ngin dang ia peit, ha ki sngi, ban sa wan, katba kim pat buh tarik, ia ka elekshon MLA ha ka jylla, la U Conrad Sangma, un ioh jingsneng ne em, na ka jingkren jong U Narendra Modi, ba un sangeh shi syndon ia kine ki kam ot ribon bad buh maw nongrim (kiba dei ki kam pynbieit briew lane ba la ju leh da ka seng Congress ha shwa u 2014), kumba la siat pharshi, da u myntri rangbah duh, ia ki kam jong ka sorkar NPP.