Ka HSPDP bad ka Khasi Jaintia State

Ka seng HSPDP, ka la nang iaid shakhmat, na ka bynta ban dawa Khasi, Jaintia State, ha ka jing iatreilang bad ka Garo Hills State Movement Committee (GHSMC) ha ryngkat bad ka NFNS lane ka National Federation for New States (NFNS).

Ka seng HSPDP, ka dei ka seng kaba rit bad ka dei ka seng, kaba shah shet man ka khep, ha la ki jong ki nongialam bad hadien ka jingkhlad noh jong U Bah HS Lyngdoh, la iohi, ba katei ka seng, ka la nang sah khunswet, ha kaba mynta kam don shuh, wat tang uwei U MLA ha iing dorbar jylla bad ngim tip, la ki jing dawa jongka, ia kat ka jylla Khasi, Jaintia, kan lah ban urlong ne em.

Donbok, ba ka Garo hills, kan kham khlain bad lada ka long kumta, ngim don lynti shuh da kumwei pat bad la hap ban ia dkhat beit arliang ia ka Khasi, Jaintia bad ki Garo.
Haduh mynta, ka HSPDP, kam pat ioh ia ka jing iatreilang ki seng sain pyrthei, ki seng bhalang, ki riew shemphang bad ki samla pule ruh bad ka la dei ka por, ia katei ka seng, ba kan wad ia ka jingkyrshan ban ai bor bad ai mynsiem, da kitei ki kynhun bapher, na bynta katei ka jing angnud jongka.

Na ki dak ki shin, ki la nang paw shai, ba ki Khasi, Jaintia, ki la nang hiar ka bhah kyrpang jongki, ha kane ka rukom pyniaid kam, kaba mynta, lada dei ha ka pule puthi, ha ka ioh kam ioh jam bad wat ha ka sain hima sima ruh bad kam dei tang kata, hynrei, kaba kham ima, ka dei halor ka jingnang shah kurup ia ki jaka puta jong ka Ri Khasi, ha ki paralok Garo jongngi bad mynta, la iohi ba ki khappud sha Ribhoi bad ki khappud sha Riwar, ki khappud sha West Khasi hills, la nang buhai shnong ki Garo.

Ka jingsuk ka shong ka suk, ka jingbun ka kamai kajih bad nangta ka jing ia shong shnong para Khasi khara, ka la pyni bang shibun ia ki paralok Garo, ba kin iai wan buhai shnong sha ka Ri Khasi jongngi bad nangta, sa ka jingwan tuid jong ki Muslim bad kiwei ki jaitbynriew sha ki jaka ri thor ka Garo hills, ka dei sa kawei na ki daw, kaba la pynjlep hi shoin ia ki Garo, ba kin don ha la ki jong ki shnong ki thaw bad kumta, ki la nang wan tur sha ki bynta ka Ri Khasi bad kane ka dei ka dak, kaba ima shibun eh, ba kin sa nang kurup shibun ki jaka puta.