Ioh iing ka mei ieid, iarap ka shnong bad ki riew kylluid mynsiem

Nongpoh: Ka la long ka jingkmen kaba khraw eh ia kawei ka Mei ieid kaba la tip kum ka Noris Rani na ka shnong Umkadhor, Ri Bhoi Sepngi, ha kaba mynhynnin ka sngi ka la ioh ban shong ban sah noh ha ka iing bad kaba la lait noh na kaba sah ha ka iingtrep bad kaba ym i long shuh ban shong ban sah ki briew.

Ia katei ka iing la tei bad kaba la aiti sha katei ka Meiieid kaba la tip kum ka Noris Rani, la tei lyngba ka jingiarap jong ka shnong Umkadhor, ha ryngkat ka jingiarap jong ki katto katne ngut ki riew kylluid mynsiem, kiba kynthup naduh ki nongmihkhmat, ki nongialam seng, ki ophisar sorkar lem bad kiwei.

Ia katei ka iing la plie da u Fr. Michael Sun Parish Priest ka Umkadhor Parish, ha ryngkat ka jingdon u Bah Andreas Tron Sordar ka Umkadhor, u Bah Center Doloi President FKJGP Western Zone, Bah Receive Pator President KSU Western Zone lem bad shibun kiwei ki riew rangbah na katei ka thain.