Shi hajar shi iing dawa pisa ki KPLT na ki longing Umtyrshing bad Umser Phah siew hapoh 3 bnai lane mad ia ka jingeh

Shillong, 1 Nailur:
U Rangbah Shnong ka shnong  Umtlieh ha Ri-bhoi district u la ong ba ki paid bah ka shnong Umtyrshing bad Umser ki la shah dawa pisa na ki dkhot ka seng kiengatiar ka Karbi People Liberation Tigers (KPLT) bad kane ka seng ka la ai por lai bnai ban siew ia kane ka pisa bad lada kim siew kin iakynduh jingeh.
Haba kren mynta ka sngi sha ki nongthoh khubor ha Shillong, u Rangbah Shnong ka Umtlieh u Bah Precious Masharing u la ong ba ki dkhot ka KPLT ki la wan ban phah shithi sha ki briew kitei ki shnong ban siew pisa T. 1000 shi bnai na man kawei ka longing bad ki dei ban pyndep hapoh shi bnai.
Kane ka la jia dang shen ha une u bnai ba la dep bad namar kane ka jingleh jong ki dkhot katei ka seng kiengatiar, ka la pynlong ia ki paidbah ban im ha ka jingsheptieng bad ka jingrit mynsiem.
“Mynshem snem ruh nga la shah byrngem pyniap ha ki lehnoh ka KPLT bad 6 bnai nga la phet na shnong”, la ong u bah Masharing bad bynrap, ba mynta la rai ban leit phai biang sha shnong da kaba aiti ha ka mon jong u Blei.
“Lada nga dei ban iap dei ban iap shisien”, la ong u bah Masharing.
U la ong ba mynshem snem u Area commander ka KPLT u Dhonsing u la wan ban kynduh ia u da kaba u la bthah ba  ki paidbah ka shnong ki dei ban siew pisa sha ka seng katkum ka jingbuh jongka hynrei na ka liang u Bah Masharing um kohnguh ia kane. Namar kane ka daw, ki la byrngem ia u da kaba ong, “Ngin pyniap ia me”, la ong u Rangbah Shnong ka Umtlieh.
Katkum ka jingiathuh une u rangbah shnong, ki lehnoh KPLT ki dawa pisa 10 hajar ia kiba don mashin tylliat khaw, 5 hajar ia kiba don kali, 2 hajar man ka thliew iing bad bun kiwei ki jingdawa ryngkat ka kyndon ba kin leh da ki kam lada kim siew ia ka jingdawa katei ka seng.
U la pynpaw ia ka jingsngewsih ba ka sorkar Meghalaya kam shym la sngap bad kam shym la leh eiei ban ai ia ka jingiada ia ki paidbah katei ka thain kaba don khappud bad ka Assam watla man ka por ki la ju leit ud leit pynsngew ia kane.
“Ka sorkar ka la kular ban buh ia ka Police Outpost ha Umtlieh bad ha Umlaper hynrei haduh mynta kam shym la urlong satia”, la ong u general secretary ka KSU Raid Nongtung Circle Bah Aloyius Bina, ba la don lang u Syiem Raid Bah Miwel Shadap.
Kat kum ka jingkren jong kine ki nongialam ka Raid Nongtung bad ki nongialam ka KSU, ka thain ka la donkam kyrkieh ba ka sorkar Meghalaya ka dei ban buh noh ia ka police outpost ha kitei ki jaka khnang ba ki paidbah kin ioh ia ka jingshngain na ka jingshah pyndik ha kitei ki lehnoh KPLT.