Khot ia kren u Lat ia U CEM bad u myntri DCA halor ka VAB 90 na ka shispah la dep eksamin; iathuh u CEM

Shillong, 1 Nailur:
U Lat ka jylla u la khot ia kren mynta ka sngi ia u Chief Executive Member ka KHADC u bah Pynshngain N Syiem bad kumjuh ruh ia u myntri ka tnad District Council Affairs u bah HDR Lyngdoh ban ia kren shaphang ka jingiaid lynti ka Village Administration Bill.
Hadien ba la dep ia kren bad u Lat u bah Pynshngain u la ong ba ha ka jingiakren ia ka VAB u Lat u la pyntip ba 90 na ka shispah u la dep eksamin, katba kaba sah mynta ka long sa tang 10 na ka shispah. U la ong ruh ba u Lat u la pyntip ba ka daw ba la pynslem ia ka VAB ka dei namar ba la don ruh ki kynhun kiba la wan ban pyrshah ia katei ka ain, bad u la ong ba hadien ba la dep ban eksamin bha ia ka 10% kaba dang sah un pynbna noh da kaba shai la un mynjur ban pynlong ain noh ia ka ne un ym treh. U bah Pynshngain u la ong ba u Lat u la kular ba un pyndep kloi ia katei ka kam kaba dang.