Ban pynjanai ïa ka pule puthi hapoh ka Jylla, ki khynnah skul, ki kmie ki kpa bad ki nonghikai ki dei ban ïatreilang, ong u lamphang dorbar

Sohra: U lamphang ka ïingdorbar thawaiñ, u bah Metbah Lyngdoh, ha ka sngi palei, u la ban jur halor ka jingdonkam ban pynjanai shuh shuh ha ka rukom hikai ha ki skul.

U bah Metbah haba ai jingkren ha ka jingïalang pynhap pyrda noh ïa ka jingrakhe dap 175 snem jong ka Cherra Presbyterian Secondary School bad ka Sohra Presbytery, u la ong ba ki khynnah skul, ki kmie ki kpa bad ki nonghikai ki dei ban shim bynta lang ban kynshew ia ka jingkitkhlieh ban kyntiew ia ka pule ka puthi kaba kynsai.

U lamphang ka ïingdorbar u la kyntu ïa ki khynnah skul, ki kmie ki kpa bad ki nonghikai ba kin trei tyngeh ban pynkhlaiñ bad shim lang ia ka jingkitkhlieh na ka bynta ban pynjanai ïa ka pule puthi hapoh ka Jylla.

Kum ban shu pyntip, ka Cherra Presbyterian Secondary School ka dei kawei na ki skul kiba la rim tam ha ka jylla bad kaba la lah ban rakhe ïa ka jingdap 175 snem naduh ba la sdang ïa ka.

“Nga sngewkmen ban ïohsngew ba kane ka skul ka la pynmih bun bha ki khynnah skul kiba la long ki riew pawkhmat bad ban pynmih ruh ki nongmihkhmat kum u symbud lamphang barim jong ka Lok Sabha u bah G.G Swell uba la khlad noh bad arngut ki Myntri Rangbah kiba kynthup ïa u bah BB Lyngdoh bad u Dr. Donkupar Roy kiba la khlad noh bad u bah S.P. Swer u ba long nongmihkhmat uba nyngkong eh sha ka Ïing Dorbar Thaw Aiñ na Sohra konstitwensi, bad kiwei kiwei ki dei ki khynnah ba la pass na kane ka skul,” ong u bah Lyngdoh.

U bah Metbah u la ai ruh ka jingïaroh ïa ki nongseng jong ka skul bad ki missionary kiba la seng ïa ka jaka pule bad ïa ka jinglah jong ki ban trei na ka bynta ki jaitbynriew bad ban ai jingïaroh ruh ia ki pastor, ka managing committee jong ka skul bad ka presbytery ïa ka jinglah jong ka ban kyntiew ïa ka skul kumba ka long mynta.

Haba ban halor ka jingjanai bad jingkynsai, u bah Metbah u la ong, “Ka skul kam dei tang ban pynmih ki ïa ki khynnah skul hynrei ka dei ban pynmih ki khynnah skul kiba kynsai kumba dawa ka kyrteng jong ka skul, ba ki khynnah kin lah ban wanrah nam ïa ka skul bad ia ka jylla baroh kawei”.

U lamphang ka Ïing Dorbar, u ai khublei ruh ïa ki nonghikai namar ka jingdon bynta jong ki kaba khraw bad jingkitkhlieh ban pynjanai ïa ka jingmut jingpyrkhat bad jingim jong ki khynnah.

Shuh shuh, u la ong ba ka skul ka dei ban ïai bteng ban pynmih shuh ki nongmihkhmat bad nongïalam kiba janai, kiba don ka jingkitkhlieh ban trei na ka bynta ka jaitbynriew.

“Ki khynnah skul ki dei ka lawei bad ki nongioh pateng jong ka jaitbynriew, namar kata ka daw la ka jingjanai ha ka pule puthi ka dawa khnang kin lah ban ïalam ïa ka jaitbynriew”, ong u bah Metbah ha ka kyrwoh khubor sha ki khynnah skul hynne ka sngi.

Ban kyntiew ïa ka skul sha ka higher secondary, u bah Metbah u ai ka jingmynjur ba kane ka skul ka la donkam ban shah pynkyntiew sha ka higher secondary school.

Nalorkata, u bah Titosstarwell Chyne, u CEM jong ka KHADC ruh haba ai jingkren kum u symbud kongsan u la ban halor ka jingdonkam ban kyntiew noh ïa ka skul.

Shuh shuh, u bah Titosstarwell u la kular ban ïarap ïa ka skul da 20 lak tyngka na ka scheme MDC, ban long kum ka lad jingïarap ïa ka skul ha kiba bun ki jingdonkam hashuwa ban kyntiew ïa ka na ka secondary sha higher secondary school.