Ka Delhi bad Himachal Pradesh, kim pdiang satia; ia ka Uniform Civil Code

Babu Kular Khongjirem

Na ka result election ba dang shu pynbna shen mynnin ka sngi,ngi iohi ba ki paidbah jong ki jylla bapher bapher jong ka ri India kim jied satia da kijuh ki party hynrei ki ia jied ha la ki jong ki jong ki state ia la ki jong ki political party bapher bapher.Ha Gujarat, tam kput ka BJP ba ka dei ka shnong trai(home state) jong u Modi bad u Amit Shah.Ha Delhi Municipality pat, pynjem khnap ka party AAP u Kejriwal ia ka BJP kaba la bat sah ia ka bor synshar jong ka Delhi Municipality mynta la kumba 15 snem kynthih.Katba ha ka jylla Himachal Pradesh pat,ki paidbah ki pynjop bad pynkhie im biang ia ka party Congress mynta ka sien kaba la sdang troin mynta ha kylleng ka ri India. Ngi iohi ba,naduh mynta u snem 2022,ka party BJP ka la sdang ban khie rasong bad khlain bor ha kylleng ka ri India, na kata ka daw, ka la sdang ban pyni bor bad sdang ban thom bor(dominate) ia ki Niam rit paid(religious minorities) khamtam eh ia ki Muslims, ki Christians,etc.kiba dei ki Niam nongwei(outside religions) kiba la ioh wan bsuh sha ri India jongngi naduh ki por mynshwa.

Ka jingthmu ba kongsan eh jong ka party BJP naduh ba la sdang seng ia ka,kalong ban wanrah noh shi tyllup ia ka jinglong Hindu ha kane ka ri Hindustan ne ri India jongngi.Hynrei,lada ka party kam don ha ka bor sorkar,kam long satia kaba suk ban pynlong kam ia katei ka jingthmu barieh(hiden dream) jongka.Ha ka por ba synshar u Vajpayee,ka BJP ka dang leh sian bha namar kam pat khlain bor satia kumba ka long mynta.Hynrei,mynta pat,kam salia shuh namar ka la khlain bor palat.Ka tip bha ba,ha ri India,lada ka kwah ban pynlieh ia kaba iong ruh long,ne ban pyniong pat ia kaba lieh ruh long namar ka la bat ia u shabuk bor synshar ha ka sorkar pdeng(central govt) ha Delhi.

Ki Muslims ki kham sian,kham stad bad kham sngewthuh ban ia ki Christian.Ki iai pynpaw bad ialeh pyrshah ia kine ki buit treikam(policy) jong ka sorkar BJP man ki khep.Mar ia shimti u Modi,ka BJP ka la lah ban khang bad set kak syndon sbak ia ka jingtuid ne ai pisa(foreign fund’ flows) ki kynhun Niam kiba na bar ri(foreign countries) sha ri India.Lada ki shah ruh,ki khein noh ia ki kum ki kynhun seng bhalang ne society.Kim khein shuh ia ki kum ki kynhun Niam ha ri India.Na kata ka daw,ki hap siew khajna(taxes) ne ai jingkhein thik pa thik lym kumta, ki don jingma ha ki bor sorkar.Ki kynhun Niam ne skul Niam ki donkam Pan Card,Registration, etc lym kumta,kim lah ban ioh jingmyntoi ei ei shuh na ka sorkar. Mynta u snem,ka BJP ka la phla shai kdar ha ki mat kular election jongka(Election manifesto) sha ka election jied nongmihkhmat sha ka Dorbar Thaw Ain jong ka state Gujarat,Himachal Pradesh,etc ba kan pyntreikam pura noh ia kata ka ain Uniform Civil Code(UCC) kaba thmu ban pynlong ain noh solonsar ia baroh ki nongshong shnong ka ri India kum kawei ka ri kawei ka jaitbynriew,kawei ka ri kawei ka Niam,kawei ktien ha satlak ka ri India,etc.bad kane ka election manifesto kan long beit ka mat kaba kongsan tam ha manla ki Assembly election kiban sa long shen ter ter nangne sha khmat sha man la ki state ka ri India. Ha Delhi,ki paidbah ki kyntait war ia katei ka jingthmu jong ka BJP.

Kumjuh ruh,ha Himachal Pradesh ki paidbah ki la jied biang ia ka party Congress(kaba la sdang troin) kaba ju ai mon laitluid ia ki kynhun Niam rit paid(religous minority) ba kin leh katba ki mon kum ka party bym ia shah niam shano shano ruh(secular party) ha ri India naduh ba ioh ia ka jinglaitluid(independence’ day).Katba ha Gujarat pat kaba dei ka jaka jong u Modi bad Amit Shah,ki paidbah ki pdiang hun ia katei ka ain (Uniform Civil Code)bad ki kwah ban sdang shwa na Gujarat,na kata ka daw, ki la pynjop kput syndon ia ka BJP. Ha u bnai February ei ei jong u snem 2023,kan don sa ka general election sha ki North Eastern Srates kynthup ia ka Meghalaya kaba la ju khein kum kata ka Christian state jong ka ri India.Hynrei,hangne ruh ka BJP kan sa leh sianti bha bad ka kham kwah ban pyntur khmat da ka party ba iajan bad iadei paralok eh ( closed political partner) jongka, bad kata ka dei ka party NPP.Lada tur khmat eh ka party BJP pyllein pyllein,kiba bun ki nongthep vote na ki Niam ba wan na bar ri(Muslims, Christians) kim da sngewtynnat bad kim nym shlan than ban jied ia ka.

Hynrei,lada ailad da ki candidate na ka NPP ba kidei hi ki para doh- para Niam lajong, dei hangta ba ka lah ban khwai bad pynngat dohkha(voters)bha shibun.Wat ki nongialam rangbah ka NPP ruh ki la dep phla lypa ba ki ioh mojority lypa bad kin thaw hi ia ka sorkar marwei hadien ka Election 2023.Lada bym dei ba ki ioh jingkyrkhu(blessing) lypa na ki nongialam ka BJP na Assam bad Delhi,kumno kin leit nud ban leit tyrwa bniat hati lypa haba u hati pat dang don sha ‘lawbah ‘lawsan.Ki Muslim ki sngewthuh bha ia ka jingktah jong kane ka ain ekjakor(UCC) jong ka BJP, hynrei ki Kristan pat,la ka long ha North East khamtam eh ha Meghalaya,tip, ki pei phang ne em halor kane.Ngin sa ia peit pat hadien ka result election 2023 ban peit ia ka liem- ka lup jong ka rai u paidbah.