La pulom ei khamakha, ka kam pynbeit pud
U Conrad & Himanta

Ka lah ban dei ka jing donbok ne ka lah ban dei pynban ka jing sniewbok, lane ka lah ban dei pynban, ba U Blei Trai kynrad, u iohsngew ia ka jingiam ki nong shong khappud, ba ka la mih ka jingiap ei ki 5ngut ki mynsiem ba kordor jong ka Shnong Mukroh bad kaba la pynkut noh syndon, ia ka kam ia pynbeit pud, hapdeng ka Assam bad ka Meghalaya.

Katba ka jia; ka jingshisha, ka long, ba U Conrad Sangma, ula duh nong bad jah burom syndon, ha kane ka kynti kaba mynta, namar ba ula iaid stet palat than, ia kane ka kam bad ba um sngap shuh iano iano ruh, ha kaba um shym la shah shkor, ia ka jing angnud ki sengbhalang bad wat ki trai jaka, kiba shong khappud.

Katto ka la biang, ba ngin pynkut noh, ba ka jingtrei kam jong u Conrad Sangma bad ka sorkar MDA, kaba u ialam, kam don soh eiei ruh em bad ka shu kut tang ha ki kam pynbiej ot ribon bad sam khunsniang bad ka pisa kaba 5hajar sha ki katto katne; hynrei ka MRSSA ruh em, ka ILP ruh em, ka ktien Khasi ruh em, ka pyllait dewiong ruh em, kam pud ruh em; ioh kam ioh jam ruh em; hynrei mynta, ka la poi sa ka apot jong ka jingkhang tih mawshun, kaba la bteng da ki bun pateng, ha ka jaitbynriew Khasi bad lah ruh ban ong, ba kiba myntoi ha kane ka sorkar, ki dei tang ki jaitbynriew Garo, lyngba ka ain jong ka roster system bad ki kharmetor, ki ban sa ioh shong ha ka iing 7 mala.
Ka jingjia, ka la pynjah burom hi khait ha khmat ka Ri hi baroh kawei, ba kan don ka sorkar, ka bym larkam eiei ruh em bad lah ruh ban ong, ba lada ka kam jong u myntri rangbah, ka long, tang ban sam khunsniang, sam khun syiar, sam pisa 5hajar tyngka, kata ka pyni, ba katei ka shuki, ka la hiar dor shibun, namar ba katei kam da donkam ban leit ot ribon lane ban leit sam mar kti; hynrei, ha kane ka juk jong ka internet Banking, ki jingmyntoi ki poi hi sha kti jong kiba dei ban ioh, lyngba ki account jongki ha Bank bad katei kan pynduna shibun ka jinglut ha ka bai petrol bad ka bai shong heli copter jong ki heh ki hain.
Ki nongialam ka BJP, ki la kam ha ki khyndiat sngi, ba ladep, ba ki la pynheh pynsan ia u khunswet Conrad Sangma (hadien ka jing khlad jong u kpa jongu), hynrei, haba ula sdang pat ban puh kylla ia ki, kumta, la iohi, ba ha kane ka kynti kin jynrat syndon, naduh tyllong ia ka seng NPP.